އަލީބާބާއަކީ ޗައިނާގެ ކުންފުންޏެކެވެ. އިންޑިއާ އާއި ޗައިނާގެ ގުޅުން ގޯސްވެ، ދަތިކުރުމުގެ ފިޔަވަޅުތައް ވެސް ވަނީ އަޅަން ފަށާފަ އެވެ.
ބައިނަލްއަގްވާމީ މީޑިއާތަކުން ރިޕޯޓުކުރާ ގޮތުގައި އަލިބަބާގައި މަސައްކަތް ކުރަމުންދިޔަ އިންޑިއާގެ މުވައްޒަފު ވަޒީފާއިން ވަކި ކުރީ ނުހައްގުންނެވެ. އެގޮތުން އެ މުވައްޒަފަށް އެ ކުންފުނީގެ އެޕްތަކުން ސެންސާޝިޕް އަދި ދޮގު ހަބަރު ފެނުމުން އެއާ ދެކޮޅަށް އަޑު އުފުލުމުން ކަމަށް ރިއުޓާސް ނިއުސް އޭޖެންސީގައި ރިޕޯޓްކުރެ އެވެ.
އެ މައްސަލަ ކުރިމަތިވެފައި ވަނީ ސެކިއުރިޓީގެ ކަންބޮޑުވުންތަކަކާއި ގުޅިގެން އަލިބާބާގެ ޔޫސީ ނިއުސް، ޔޫސީ ބްރައުސަރު، އަދި ޗައިނާގެ 57 އެޕެއް އިންޑިއާގައި މަނާ ކުރިތާ ހަފުތާތަކެއް ފަހުންނެވެ. އިންޑިއާގައި ޗައިނާގެ އެޕްތަކެއް މަނާ ކުރުމާއި ގުޅިގެން އިންޑިއާއިން ވަނީ އެ ކުންފުނިތަކުން ލިޔުންތަކެއް ހޯދާފައެވެ.
އެކުންފުނީގެ އިންޑިއާގެ އޮފީހެއްގައި މަސައްކަތްކުރާ މުވައްޒަފަކު ގަވާއިދާ ހިލާފަށް ވަޒީފާއިން ކަނޑާލި ކަމަށް ބުނާ މައްސަލައިގައި މުވައްޒަފު ތުހުމަތުކުރަނީ އޭނާ ވަޒީފާއިން ކަނޑާލާފައި ވަނީ އަލީބާބާގެ ބައެއް އެޕްލިކޭޝަންތަކުގައި ޗައިނާއާ ދެކޮޅަށް ހުންނަ ތަކެތި ނެގުމަށް ދެކޮޅަށް ހެދުމުން ކަމަށެވެ.
އެ މައްސަލައިގައި ޖެކް މާގެ އިތުރުން އަލީބާބާ ކުންފުނީގެ އެކި ޑިޕާޓްމަންޓުތަކުގައި މަސައްކަތް ކުރާ މީހުން ޖުލައި މަހުގެ 29 ވަނަ ދުވަހު ކޯޓަށް ހާޒިރުވުމަށް ވަނީ އަމުރުކޮށްފަ އެވެ. އަދި އެ ކުންފުނިން 30 ދުވަހުގެ ތެރޭގައި ލިޔުމުން ޖަވާބުދާރީވުމަށް ކޯޓުން އަންގާފައިވެ އެވެ.
