ކަސްޓަމްސް އިން ވަނީ ކަސްޓަމްސްގައި ރަޖިސްޓްރީކޮށް ލައިސަންސް ދޫކޮށްފައިވާ ފަރާތްތަކުން، 16 އޮގަސްޓު 2020 ވަނަ ދުވަހުގެ ކުރިން، ޓްރާންސްޕޯޓު މިނިސްޓްރީގައި ރަޖިސްޓަރީވެފައިވާ ފަރާތެއްކަން އަންގައިދޭ ލިޔުން ހުށަހެޅުމަށް އަންގާފަ އެވެ.
އެ މުއްދަތު މިއަދަށް ހަމަވާ އިރު، ޓްރާންސްޕޯޓް މިނިސްޓްރީ އިން ވަނީ ޝިޕިން އެޖެންސީގެ ހިދުމަތްދޭ ކުންފުނިތަކުންް ރެޖިސްޓްރީ ވާން ޖެހޭ މުއްދަތު ސެޕްޓެމްބަރު 15 ވަނަ ދުވަހުގެ ނިޔަލަށް އިތުރުކޮށްފަ އެވެ.
މިދިޔަ މަހުގެ 16 ވަނަ ދުވަހު ދިވެހި ސަރުކާރުގެ ގެޒެޓްގައި އާއްމު ކުރެވިފައިވާ ރާއްޖޭގައި ޝިޕިންގް އޭޖެންސީގެ ހިދުމަތް ދިނުމާބެހޭ ގަވާއިދު ގެ ހަތަރު ވަނަ މާއްދާގެ (ހ) ގައި، ރާއްޖޭގައި ޝިޕިންގް އޭޖެންސީގެ ހިދުމަތް ދެވޭނީ، މޯލްޑިވްސް ޓްރާންސްޕޯޓް އޮތޯރިޓީގައި ރަޖިސްޓަރީވެފައިވާ ފަރާތްތަކަށްކަމަށް ވަނީ ބުނެފަ އެވެ.
އަދި އެގަވާއިދުގެ ފަސް ވަނަ މާއްދާގައި، އެގަވާއިދަށް އަމަލުކުރަން ފަށާއިރު ޝިޕިންގް އޭޖެންސީގެ ހިދުމަތްދޭ ކުންފުނިތަކުން، 30 ދުވަހުގެ ތެރޭގައި މޯލްޑިވްސް ޓްރާންސްޕޯޓް އޮތޯރިޓީގައި ރަޖިސްޓަރީ ކުރަންވާނެކަމަށާއި، އެމުއްދަތުގެ ފަހުން މޯލްޑިވްސް ޓްރާންސްޕޯޓް އޮތޯރިޓީގައި ރަޖިސްޓަރީގައި ރަޖިސްޓަރީ ނުކޮށް އެއްވެސް ފަރާތަކުން ޝިޕިން އޭޖެންސީގެ ހިދުމަތް ދިނުމަކީ މަނާކަމެއްކަމަށް ބަޔާންކޮށްފައިވެއެވެ.
