ރާއްޖެ ޓީވީގެ ސިޔާސީ ދުނިޔެ ޕްރޮގުރާމްގައި ވާހަކަދައްކަވަމުން ރޮޒެއިނާ ވިދާޅުވީ ސިޔާސީ އިދިކޮޅު ފަރާތްތަކުން އައްޑޫގެ ތަނެއް ވިއްކާލައިގެން އުޅޭކަމަށް ބުނެ ހަދަނީ ހުސް ދޮގު ކަމަށާއި އެއްވެސް ތަނެއް ވިއްކާ ނުލާ ކަމަށެވެ. އަދި އެތަނުގައި ހަދަނީ އިންޑިއާގެ 30 މިލިއަން ޑޮލަރުގެ ގުރާންޓް އެހީއެއްގެ ދަށުން ހަދާ ފުލުހުންގެ އެކަޑަމީއެއް ކަމަށް ރޮޒެއިނާ ވިދާޅުވި އެވެ.
ރޮޒެއިނާ ވިދާޅުވީ އެއީ "މިލިޓަރީ ބޭސް" އެއްވެސް ނޫން ކަަމަށާއި އެތަނަކީ މަސައްކަތް ނިމުމާއިއެކު ދިވެހި ސަރުކާރާއި ހަވާލުކުރެވޭނެ ތަނެއް ކަމަށެވެ. އެ ޕްރޮޖެކްޓާއިއެކު އައްޑޫގެ އިގްތިސާދު ފުޅާކުރުމަށް ވަރަށް ބޮޑު އެހީތެރިކަމެއް ލިބޭނެ ކަމަށް ރޮޒެއިނާ ވިދާޅުވި އެވެ.
އައްޑޫއަކީ އިންޑިއާ ބަޔަކަށް ވިއްކާލާފައި އޮތް ތަނެއް ނޫން ކަމަށް ބުނާ ވާހަކަ ތަކުރާރުކުރައްވާ ވިދާޅުވީ އެއީ އިންޑިއާ ބަޔަކު ތިބެން ހަދާ ތަނެއް ނޫން ކަމަށާއި، އެ ވާހަކަތަކަކީ އޮޅުވާލުމާއި ވަރަށް ބޮޑު ދޮގުތަކެއް ހަދައިގެން ދިވެހި ސަރުކާރާއި އިންޑިއާ އަދި ރައްޔުތުންނަށް ޖެއްސުމަށް އިދިކޮޅު ފަރާތްތަކުން ކުރަމުންދާ ކަމެއް ކަމަށެވެ.
ރޮޒެއިނާ ވިދާޅުވީ އިދިކޮޅު ފަރާތްތަކުން އެ މަސައްކަތް ކުރާ ބޭނުން ވެސް އޮޅިގެން ނޫޅޭ ކަމަށެވެ. މިހާރު އިދިކޮޅު ފަރާތްތަކަށް ވެގެން އުޅޭ ގޮތަކީ އިންޑިއާ އާއި އެކު ދިވެހި ސަރުކާރުން ކުރާ މަސައްކަތްތަކުން ރާއްޖެއަށް ފަސް އަހަރުގެ ތެރޭގައި ލިބިގެން ދާނެ ތަރައްގީ ފެނި އެ ފަރާތަތްކަށް ވެރިކަމަށް އަންނަން ފުރުސަތު ނުލިބިދާނެތީ ބިރުގަންނަނީ ކަމަށް ރޮޒެއިނާ ވިދާޅުވި އެވެ.