ސީއެންއެމްއަށް މައުލޫމާތު ދެއްވަމުން ފިނޭންސް މިނިސްޓްރީން ބުނެފައިވަނީ މަޖިލިސް ޗުއްޓީއިން އައުމުން ރިވައިޒްޑް ބަޖެޓެއް ހުށަހެޅުމަށް ނިންމާފައިވާކަމަށެވެ. އެގޮތުން ރިވައިޒްޑް ބަޖެޓްގައި މިއަހަރަށް ލަފާކޮށް މިދިޔަ އަހަރު މަޖިލީހުން ފާސްކުރި ބަޖެޓްގައި ހުރި ބައެއްކަންކަން އެޑްޖަސްޓް ކޮށްފައިވާނޭ ކަން ފާހަގަ ކުރެއްވި އެވެ.
ކޮވިޑް19 އާއި ގުޅިގެން ދައުލަތަށް ލިބޭނެ ކަމަށް އަންދާޒާ ކުރި އާމްދަނީ ނުލިބޭނެ ކަމަށް މިހާރު ލަފާކޮށްފައިވެ އެވެ. އަދި ދައުލަތުގެ ހަރަދުތައް ކުޑަކުރުމަށްވެސް ބޮޑެތި މަސައްކަތްތަކެއް އަންނަނީ ކުރަމުންނެވެ. އެހެން ނަމަވެސް ތަރައްގީގެ މަޝްރޫއުތައް ހުއްޓުމެއްނެތި ކުރިއަށްގެންދިއުމަށް ސަރުކާރުން ވަނީ ނިންމާފައެވެ.
މީގެ އިތުރުން 2021 ވަނަ އަހަރަށް ލަފާ ކުރާ ބަޖެޓްވެސް ފިނޭންސް މިނިސްޓްރީގެ ފަރާތުން މަޖިލީހަށް އޮކްޓޯބަރު މަހުގައި ހުށަހަޅާނެ އެވެ. އަދި ބަޖެޓް އެކުލަވާލުމުގެ މަސައްކަތްތައް މިހާރު ކުރިއަށްދާކަމަށް އެ މިނިސްޓްރީން މައުލޫމާތު ދީފައިވެ އެވެ.
ދައުލަތަށް މިއަހަރު މިހާތަނަށް ލިބުނު އާމްދަނީ ބޮޑުތަނުން ދަށަށް ގޮސްފައި ވަނީ ކޮވިޑް-19 ގެ ސަބަބުން ރާއްޖޭގެ އިގްތިސޯދު، އެންމެ ބޮޑަށް ބަރޯސާވެފައިވާ އޮތް ފަތުރުވެރިކަމުގެ ސިނާއަތް ތިން މަސް ދުވަހަށް މެދުކަނޑާލަން ޖެހުމުންނެވެ. ޖުލައި 15 ވަނަ ދުވަހު، ރާއްޖޭގެ ބޯޑަރު އަލުން ހުޅުވާލި ނަމަވެސް އަދިވެސް ގައުމުތަކުގައި ކޮވިޑްގެ ނުރައްކާތެރިކަން އޮތުމުން ފަތުރުވެރިކަމުގެ ސިނާއަތް އެންމެ ރަނގަޅަށް ހިނގައިގެންފައެއް ނުވެ އެވެ.
