Advertisement

ހުވާވޭ ނޯވާ 5ޓީ ސީރީޒްގެ ސްމާޓް ފޯން، ހުވާވޭގެ ރާއްޖޭގެ ސޯލް ޑިސްޓްރިބިއުޓަރ މެކްސްކޮމް ޓެކްނޮލޮޖީއިން ބާޒާރަށް ނެރެފި އެވެ.

"އަތަށް ފަސޭހަ، ޖީބަށް ލުއި" މި ފޯން ވިއްކަން ފެށީ މިރޭ (އަންގާރަ ދުވަހުގެ ރޭ)، ސޯސަން މަގުގައި ހުންނަ މަކްސްކޮމް ޓެކްނޮލޮޖީސްގެ ފިހާރައިގައި ބޭއްވި މީޑިއާ އިވެންޓްގަ އެވެ.

"މި ފޯން ޖީބަށް ލުއި ފޯނަކަށް މިވީ ވިއްކާ އަގުގެ ގޮތުން، އަދި ސައިޒުގެ ވެސް ގޮތުން،" މެކްސްކޮމްގެ މެނޭޖިން ޑިރެކްޓަރު މުހައްމަދު ފަޒީލް ވިދާޅުވި އެވެ.

މި ފޯން ބާޒާރަށް ނެރުނީ ހާއްސަ ޕްރޮމޯޝަނަކާއެކު އެވެ. ޕްރޮމޯޝަންގައި ފޯން 7299 ރުފިޔާއަށް ވިއްކާއިރު، ހުވާވޭ ބޭންޑް 4 ގެ ގަޑިއެއް ހިލޭ ލިބޭނެ އެވެ.

ހުވާވޭގެ ފަހުގެ އެހެން ފޯންތަކެކޭ އެއްގޮތަށް ނޯވާ 5ޓީ ސީރީޒްގެ ފޯނުތަކުގެ ވެސް ކެމެރާ ވަރަށް ވަރުގަދަ އެވެ. ފޯނުގެ ފަހަތުގައި ހަތަރު ކެމެރާ ހިމަނާފައިވާއިރު، ފަހަތުގެ ކެމެރާއިން 48 މެގަޕިކްސްގައި ފޮޓޯ ނެގެ އެވެ. ސެލްފީ ކެމެރާއިން، 32 މެގަޕިކްސެލްގައި ފޮޓޯ ނެގޭނެ އެވެ.

މި ފޯނަކީ 5.5 އިންޗީގެ ފޯނެކެވެ. 8 ޖީބީ ރޭމް ހިމެނޭއިރު، މި ފޯނުގެ ސްޓޯރޭޖްގައި 128 ޖީބީ ހުންނައިރު، ޖާގަ 256 ޖީބީ އަށް އިތުރުކޮށްލެވޭނެ އެވެ.

"މި ހުރިހާ މޮޅު ކަމަކާއެކު، މިއީ މެދު ރޭންޖްގެ އެންމެ ވަރުގަދަ ފޯނަށް ވާނެ، އަގުވެސް އަތް ފޯރާ ފަށުގައި" ފަޒީލް ވިދާޅުވި އެވެ.

މެކްސްކޮމް އަކީ ހުވާވޭ ބްރޭންޑްގެ އިތުރުން، ޑެލް ބްރޭންޑްގެ ރާއްޖޭގެ ސޯލް ޑިސްޓްރިބިއުޓަރެވެ. މި ކުންފުނި ހިންގާތާ މިއީ 15 ވަނަ އަހަރެވެ.