ގާތްގަނޑަކަށް އަށް ހާސް މީހުންގެ ކުރިމަތީގައި ކުޅުނު މި މެޗުގައި ބަންގްލަދޭޝްގެ ފުރަތަމަ ގޯލް މެޗުގެ ވަރަށް ކުރީކޮޅު ކާމިޔާބުކޮށްދިނީ، ޖިބޯންއެވެ. ދެވަނަ ގޯލް ދެވަނަ ހާފު ތެރޭގައި ބަންގްލަދޭޝްއަށް ޖަހައިދިނީ، ސުފީލްއެވެ.
މިއީ ޖެނުއަރީ މަހު ބަންގްބަންދް ގޯލްޑް ކަޕުގެ ފަހުން ބަންގްލަދޭޝްގެ ގައުމީ ޓީމު ކުޅުނު ފުރަތަމަ މެޗެވެ. އަދި މިއީ، ކޮވިޑާ ގުޅިގެން ފުޓްބޯޅައިގެ ހަރަކާތްތައް މެދު ކަނޑާލި ފަހުން ދެކުނު އޭޝިއާ ސަރަހައްދުގައި ކުޅެވުނު ފުރަތަމަ މެޗުވެސް މެއެވެ. ބަންގްލަދޭޝްއާ ނޭޕާލްގެ އެކުވެރިކަމުގެ ސީރީޒްގެ ދެވަނަ މެޗު ކުޅޭނީ މި މަހުގެ ސަތާރަވަނަ ދުވަހުއެވެ.
ގާތްގަނޑަކަށް ތިރީހަކަށް ހާސް މީހުންގެ ޖާގައިގެ ސްޓޭޑިއަމަށް ވަންނަން ފުރުސަތު ދީފައިވަނީ އަށް ހާސް މީހުންނަށެވެ. އެހެންނަމަވެސް މީޑިއާ ރިޕޯޓްތައް ބުނާ ގޮތުގައި އެ އަދަދަށްވުރެ އިތުރަށް މީހުން ދަނޑަށްވަދެފައިވުމަކީ އެކަށީގެންވާކަމެކެވެ. ބަންގްލަދޭޝްއަކީ ފުޓްބޯޅައިގެ ފޯރި ގަދަ ގައުމެކެވެ. ސްޓޭޑިއަމަށް ވަތް މީހުންތައްވަނީ "ފުޓްބޯޅަ އަލުން އެނބުރި އައިސްފި" ކަމަށް ލިޔެފައިވާ ބެނާތައް ދަނޑަށް ވައްދައި އުފާފާޅުކޮށްފައެވެ.
