މިނިސްޓަރު ވިދާޅުވީ މިހާރުވެސް ރާއްޖޭގެ ހިރިގަލު ހަ މިސްކިތެއް ދުނިޔޭގެ ތަރިކައިގެ ވަގުތީ ލިސްޓުގައި ހިމެނިފައިވާކަމަށާއި އެ މިސްކިތްތައް ވެސް ޔުނެސްކޯގެ ދާއިމީ ލިސްޓަށް ލުމުގެ މަސައްކަތް ކުރަމުންދާ ކަމަށެވެ.
މިނިސްޓަރު ވިދާޅުވީ ކަޅުވަކަރު މިސްކިތަކީ ނަމޫނާ މިސްކިތެއް ކަމަށާއި އެތަނުން ދައްކައިދެނީ ދިވެހިންގެ ތާރީހާއި ތަަރިކަ އަދި ފަންނުވެރިކަން ކަމަށެވެ. މިނިސްޓަރު ވިދާޅުވީ ހަމައެކަނި ކަޅުވަކަރު މިސްކިތްތޯ ހިމާޔަތްކުރަނީ ބައެއް ފަރާތްތަކުން ސުވާލުކޮށް ފާޑުކިޔާކަމަށާއި އެހެންނަމަވެސް ހިމާޔަތް ކުރުމަށް މަސައްކަތްކުރަމުން ދަނީ ހަމައެކަނި ކަޅަވަކަރު މިސްކިތް ނޫންކަމަށެވެ.
ކަޅުވަކަރު މިސްކިތަކީ ރައީސް ޔާމީންގެ ސަރުކާރުން އެ މިސްކިތް ރޫޅާލުމަށްފަހު އެހެންތަނަކަށް ގެންދަން ނިންމާފައިވާ މިސްކިތެކެވެ. އެހެންނަމަވެސް ފަހުން ޗާންދަނީ މަގު ކުރީގެ ދިރާގު ހެޑް އޮފީސް ހުރި ސަރަހައްދުގައި ކަޅުވަކަރު މިސްކިތް އަލުން ރާވައި ނިންމާލާފައިވަނީ މިއަހަރުގެ ފެބްރުއަރީ 21 ވަނަ ދުވަހުއެވެ.
ކަޅުވަކަރު މިސްކިތަކީ ލަކުޑީގެ ރީތި މަސައްކަތްތަކާއި، ގަލުވަޑާމުގެ ކަވި މަސައްކަތްތަކާ އެކު ދިވެހިންގެ އަތްތެރިމަސައްކަތް ވަރަށް ރީތިކޮށް ދައްކުވައިދެ މިސްކިތެކެވެ.
ކަޅުވަކަރު މިސްކިތް އަލުން ބެހެއްޓިއިރު މިސްކިތުގެ ހިރިގަލުގެ ބްލޮކްތަކަށް ކޮންމެވެސް ވަރަކަށް ގެއްލުންތަކެއް ލިބިފައިވާތީ އެފަދަ ބްލޮކްތައް ހެރިޓޭޖް މިނިސްޓްރީން ވަނީ ބޭނުންކުރެވޭ ގޮތަށް ހަދާފަ އެވެ.
ކަޅުވަކަރު މިސްކިތުގެ ހިރިގަލުގެ ބަޔަކީ ހިރިގަލުގެ ބްލޮކްތަކަކުން ރާވާލާ ގޮތަށް ހަދާފައިވާ ބަޔަކަށް ވާތީ ހިރިގަލުގެ ބައިގެ މަސައްކަތްތައް ނިމުމާ އެކު މިސްކިތުގެ ހައިބަތު މިހާރުވެސް ވަނީ ފެންނަން ފަށާފަ އެވެ.
ކަޅުވަކަރު މިސްކިތް އަލުން ރޭވުމަށް ކުރަންޖެހޭ މަސައްކަތުގެ މައިގަނޑު މަސައްކަތްތައް ނިމިފައިވީ ނަމަވެސް މިސްކިތް ހުރި ސަރަހައްދު އާންމުންނަށް ހުޅުވާލާނެ ވަކި ދުވަހެއް ހެރިޓޭޖު މިނިސްޓްރީން އަދި ހާމަކޮށްފައެއް ނުވެ އެވެ.
ކަޅުވަކަރު މިސްކިތް އަލުން ހެރިޓޭޖް ސައިޓެއްގެ ގޮތުގައި ބޭނުންކުރަން ނިންމާފައިވީ ނަމަވެސް މިމިސްކިތުގައި ނަމާދު ކުރެވޭނެ ކަމަށްވެސް ހެރިޓޭޖް މިނިސްޓްރީން ވަނީ ބުނެފަ އެވެ.
