ދިވެހި ކަނޑުމަހުގެ ބާވަތްތައް ލަންކާއަށް އެތެރެކުރުމުގައި ހުރަހެއް ނެތްކަން އަންގާފައި މިވަނީ ހިއްކާފައި ހުންނަ މަހުގެ ގިނަ ބާވަތްތައް އެތެރެކުރުން ލަންކާގެ އާސަރުކާރުން މަނާކުރި ދަނޑިވަޅެއްގަ އެވެ.
އެކަމާއި ގުޅިގެން ފޮރިން މިނިސްޓަރު އަބްދުﷲ ޝާހިދު ވަނީ ސްރީލަންކާ ސަރުކާރަށް ޝުކުރު އަދާކުރައްވާ ޓްވީޓެއް ކުރައްވާފައެވެ. މިނިސްޓަރު ޝާހިދު ވިދާޅުވީ، ސްރީލަންކާއަށް އިމްޕޯޓްކުރާ ދިވެހި ކަނޑުމަހުގެ ބާވަތްތައް އެގައުމަށް އެތެރެކުރުމުގައި އެއްވެސް ހުރަހެއް ނޯންނާނެކަމުގެ ޔަގީންކަން ސްރީލަންކާގެ ސަރުކާރުން ދެއްވާފައިވާ ކަމަށެވެ.
ސްރީލަންކާއަށް މަހުގެ ބާވަތްތައް އެތެރެކުރުމުގެ ސިޔާސަތަށް ގެނައި ބަދަލުތަކާއެކު، ނިމިދިޔަ ހަފްތާގައި އެގައުމަށް އެތެރެކުރި މަހުގެ ޝިޕްމަންޓްތަކެއް އެތެރެނުކުރެވުނު މައްސަލަ ހައްލުކޮށް، އެ ޝިޕްމަންޓްތައްވެސް ވަނީ އެގައުމަށް އެތެރެކޮށްފައެވެ. އެގޮތުން މި ޝިޕްމަންޓު އެތެރެކުރެވިފައިވަނީ، މިނިސްޓަރު ޝާހިދު އާއި ސްރީލަންކާގައި ހުންނަވާ ދިވެހި ހައިކޮމިޝަނަރާއި، ސްރީލަންކާ ސަރުކާރުގެ އިސް ބޭފުޅުންނާއެކު ކުރެއްވި މަޝްވަރާތަކަށްފަހުއެވެ.
މީގެ އިތުރުން ދާދިފަހުން މިނިސްޓަރު ޝާހިދު ވަނީ، ޔޫރަޕުގެ މާކެޓަށް ރާއްޖެއިން މަސް އެކްސްޕޯޓް ކުރުމުގައި ޑިއުޓީ ފްރީކުރުމާއި ގުޅޭގޮތުން އަޔަލޭންޑް ފޮރިން މިނިސްޓަރާއި އެކުވެސް މަޝްވަރާކުރައްވާފަ އެވެ.
