މިދިޔަ މަހުގެ 26 ވަނަ ދުވަހު ސަރުކާރުން އާންމުކޮށްފައިވާ ޝިޕިން އޭޖެންސީގެ ގަވާއިދުގައިވާ ގޮތުން ޝިޕިން އޭޖެންސީގެ ހިދުމަތް ދެވޭނީ އެ ގަވާއިދަށް އަމަލުކުރަން ފަށާ ތާރީހުން ފެށިގެން އެ ގަވާއިދުގެ ދަށުން ހޯދަންޖެހޭ ލައިސެންސް ހޯދުމަށް ފަހުގައި އެވެ.
ޝިޕިން އޭޖެންސީގެ ގަވާއިދުގައިވާ ގޮތުން ގަވާއިދަށް އަމަލުކުރަން ފަށާ ތާރީހުން ފެށިގެން ތިރީސް ދުވަހުގެ ތެރޭގައި އެ ހިދުމަތް ދިނުމުގެ ލައިސެންސް ހޯދަން ޖެހެ އެވެ.
އެހެންކަމުން ކަސްޓަމްސްގެ އާންމު ގަވާއިދުގެ ދަށުން އުޅަނދު ފަހަރުގެ އޭޖެންޓުންގެ ގޮތުގައި އެ މުއައްސަސާގައި ރަޖިސްޓްރީކޮށް ލައިސެންސް ދޫކޮށްފައިވާ ފަރާތްތަކުން މިދިޔަ މަހުގެ 26 އިން ފެށިގެން ތިރީސް ދުވަހުގެ ތެރޭގައި ޓްރާންސްޕޯޓް އޮތޯރިޓީ އިން ޝިޕިން އޭޖެންސީގެ ހިދުމަތް ދިނުމުގެ ލައިސެންސް ދޫކޮށްފައިވާ ފަރާތެއްކަން އެނގޭނެ ފަދަ ލިއުމެއް އެ އިދާރާއަށް ހުށަހަޅަން ޖެހޭނެ އެވެ.
އަދި ކަސްޓަމްސްގެ އާންމު ގަވާއިދުގެ 477 ވަނަ މާއްދާ އާއި 229 ވަނަ މާއްދާގެ ދަށުން އުޅަނދު ފަހަރުގެ އޭޖެންޓުންގެ ލައިސެންސް ހޯދުމަށާއި، އޭޖެންޓުންގެ ލައިސެންސް އައުކޮށްދިނުމަށް އެދި ކަސްޓަމްސް އަށް ހުށަހަޅާ ކުންފުނިތަކުން އެ ކުންފުނިތަކަކީ ޓްރާންސްޕޯޓް އޮތޯރިޓީ އިން ޝިޕިން ހިދުމަތް ދިނުމުގެ ލައިސެންސް ދޫކޮށްފައިވާ ފަރާތެއްކަން އެނގޭނެ ފަދަ ލިއުމެއް ހުށަހަޅަން ޖެހޭނެ އެވެ.
