މި ބިލު ރައީސް ތަސްދީގު ކުރެއްވުމާއިއެކު އިސްލާހު ކުރައްވާފައިވަނީ އެކްސްޕޯޓް އިމްޕޯޓް ގާނޫނުގެ 7 ވަނަ މާއްދާއެވެ. އެގޮތުން މި ގާނޫނުގެ 7 ވަނަ މާއްދާގައި ހިމެނޭ ޕްލާސްޓިކާއި، ޕްލާސްޓިކުން ތައްޔާރުކޮށްފައިވާ ތަކެތީގެ ތެރެއިން އެއް ފަހަރު ބޭނުންކޮށްފައި އުކައިލެވޭ ޒާތުގެ ތަކެތީގެ ގޮތުގައި ރައީސުލްޖުމްހޫރިއްޔާ ކަނޑައަޅުއްވާ ތަކެތި ރާއްޖެއަށް އެތެރެކުރުން މި ބިލާއެކު މަނާ ކުރެވޭނެއެވެ.
އަދި މިބިލުގައި، އެފަދަ ތަކެތީގެ ލިސްޓެއް، އެކި މަރުޙަލާ ތަކަކަށް ބައްސަވާލައްވައިގެން، ކަނޑައެޅުއްވުމުގެ އިހްތިޔާރު ރައީސް އަށް ލިބިދެއެވެ. އެގޮތުން އެފަދަ ލިސްޓެއް ކަނޑައަޅުއްވައި، އަންނަ އަހަރު ފެށުމުގެ ކުރިން ދިވެހި ސަރުކާރުގެ ގެޒެޓުގައި ޝާއިރު ކުރުމާއި، އެލިސްޓު ގެޒެޓުގައި ޝާއިރު ކުރާއިރު، ސިންގަލް ޔޫސް ޕްލާސްޓިކުގެ ގޮތުގައި ރައީސް ކަނޑައަޅުއްވާފައިވާ ތަކެތި ބޭނުންކުރުން މަނާކުރާނެ ތާރީހެއް ކަނޑައަޅާފައި އޮންނަން ޖެހެއެވެ.
މި ބިލު ރައީސް ތަސްދީގު ކުރެއްވުމާއިއެކު މި ގާނޫނުގެ 7 ވަނަ މާއްދާއަށް އިސްލާހު ގެނައުމުގެ އިތުރުން މި ގާނޫނުގެ 12 ވަނަ މާއްޗާ އުނިކުރެވިގެންދާނެއެވެ. މި ބިލަކީ މިއަހަރުގެ ޑިސެންބަރު 7 ވަނަ ދުވަހު ބޭއްވެވި ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރުގެ 28 ވަނަ ޖަލްސާގައި ފާސްކުރި ބިލެކެވެ.
