ގައުމީ ޝިޕިން ކުންފުނި ކަމަށްވާ މޯލްޑިވްސް ސްޓޭޓް ޝިޕިން (އެމްއެސްއެސް) އިން ބުނީ މިއަދު ބަނދަރު ކުރި ކާގޯ ފެރީން 700 ޓަނުގެ މުދާ ގެނެސްފައިވާ އިރު، އޭގެ ތެރޭގައި ގިނައީ އާންމު މުދަލާއި އިމާރާތް ކުރުމަށް ބޭނުންކުރާ މުދާ ކަމަށެވެ.
ކާގޯ ފެރީގެ ހިދުމަތް ފެށި ފަހުން ކޮންމެ ދަތުރަކު ވެސް ގެންނަ މުދަލުގެ އަދަދު އިތުރުވަމުން އަންނަ ކަމަށް އެމްއެސްއެސް އިން ވަނީ ބުނެފަ އެވެ.
އިންޑިއާގެ ކޮޗިން އާއި ކުޅުދުއްފުށީ ސިޓީއާ ދެމެދު މިދިޔަ އަހަރުގެ ސެޕްޓެމްބަރު މަހުގެ 26 ގައި ފަށާފައިވާ ކާގޯ ފެރީގެ ހިދުމަތް ދޭން ނިންމާފައިވަނީ ސަރަހައްދުގެ ވިޔަފާރިތައް ކުރިއަރުވައި، އާންމުންނަށް މުދާ ހޯދުމަށް މަގުފަހި ކޮށްދިނުމަށް ކަމަށް ސަރުކާރުން ވަނީ ބުނެފަ އެވެ.
ކާގޯ ފެރީގެ ހިދުމަތުގެ ސަބަބުން ރާއްޖޭގެ އުފެއްދުންތައް ބޭރު ގައުމުތަކުގައި އިޝްތިހާރުކޮށް މަންފާ ހޯދުމަށް މަގުފަހިވާނެ ކަމަށް ވެސް ސަރުކާރުން ބުނެ އެވެ.
ކޮޗިން ފެރީން މުދާ ގެންނަން ބޭނުންވާ ފަރާތްތަކަށް އެ ފުރުސަތު ހުޅުވާލާފައިވާ އިރު، އެމްއެސްއެސްގެ ހޮޓްލައިނަށް ގުޅާލައިގެން ނުވަތަ އީމެއިލް ކޮށްގެން މުދާ ގެނެވޭނެ އެވެ.
