މި މައްސަލާގައި ކަޕިލް ހާޒިރުކޮށް ބަޔާން ނަގާފައި ވާއިރު، ވަގު ކާރުތަކުގެ މައްސަލައެއް އޭނާ އަމިއްލައަށް ވެސް ވަނީ ފުލުހުންނަށް ހުށަހަޅާފަ އެވެ.
އެގޮތުން ކާރު ޑިޒައިނަރު ދިލިޕް ޗަބްރިއާ އޭނާއަށް މަކަރު ހަދާފައިވާ ކަމަށް އެ މައްސަލާގައި ބުނެފައި ވެއެވެ. ޗަބްރިއާ މިހާރު ހުރީ ހައްޔަރުކޮށްފަ އެވެ.
ފުލުހުންނަށް ބަޔާން ދިނުމަށް ފަހު މީޑިއާއަށް މައުލޫމާތު ދެމުން ކަޕިލް ބުނެފައި ވަނީ އޭނާ ވޭނަކަށް އޯޑަރު ދިނީ 2017 ގައި ކަމަށާއި ޗަބްރިއާގެ މިފަދަ މައްސަލަތަކެއް އުޅޭކަން އެނގުނީ އޭގެ ފަހުން ކަމަށެވެ.
ސެލެބްރިޓީ ކާރު ޑިޒައިނަރެއްގެ ގޮތުގައި މަޝްހޫރު ދިޕިލް ހައްޔަރުކޮށްފައި ވަނީ ޑިސެމްބަރު 28 ގައެވެ. އޭނާއަށް ތުހުމަތު ކުރަނީ ފޭކު ލިޔުންތައް ހެދުމާއި މަކަރު ހެދި ކަމަށެވެ.
ކަޕިލް ޝަރުމާއަކީ ކޮމީޑިއަނެއްގެ އިތުރުން މަޝްހޫރު އެކްޓަރެކެވެ. އޭނާ ހުށަހަޅާ "ދަ ކަޕިލް ޝަރުމާ ޝޯ" އަކީ ދިވެހިންގެ ތެރޭގައި ވެސް ވަރަށް މަގްބޫލު ޓީވީ ޝޯއެކެވެ.
