ވަރުން އާއި ނަތާޝާ މީގެ ކުރިން ކައިވެނި ކުރަން ނިންމީ 2019 ގައެވެ. ނަމަވެސް ކޮވިޑް-19 ބަލިމަޑުކަން ދިމާވުމާ ގުޅިގެން އެމީހުންނަށް ޖެހުނީ ކައިވެނި ފަސްކުރާށެވެ.
"ކޫލީ ނަންބަރު 1" އިން ފެނުނު ވަރުން ފިލްމްފެއާ މަޖައްލާއަށް ދިން އިންޓަވިއުއެއްގައި ބުނީ ފާއިތުވި ދެ އަހަރު އެންމެން ވެސް ދައްކަނީ އޭނާގެ ކައިވެނީގެ ވާހަކަ ކަމަށެވެ.
އެކަމަކު މި ވަގުތު ދުނިޔޭގައި އެއްވެސް ކަމެއް ޔަގީން ނުކުރެވޭނެ ކަމަށާއި މި އަހަރު ކަންކަން ހަމައަކަށް އެޅިއްޖެ ނަމަ ވެޑިން ބޭއްވުން އެކަށީގެންވާ ކަމަށް ވަރުން ބުންޏެވެ.
އޭގެ އިތުރުން ކައިވެންޏަށް ވަރަށް ސީރިއަސްކޮށް ޕްލޭން ކުރަމުންދާ ކަމަށާއި އެކަމަކު އެއްޗެއް ބުނަން އަދި މާ އަވަސް ކަމަށް ވަރުން ވަނީ ބުނެފަ އެވެ.
ވަރުންގެ އިތުރުން ބައެއް އެހެން ސެލެބްރިޓީން ވެސް މި އަހަރު ކައިވެނި ކުރާނެ ކަމަށް ބެލެވެ އެވެ. އެގޮތުން ރަންބީރު ކަޕޫރު ވެސް ދާދި ފަހުން ބުނީ ކޮވިޑް ނެތް ނަމަ މިހާރު އޭނާ ހުންނާނީ އާލިއާ ބަޓްއާ ކައިވެނިކޮށްގެން ކަމަށެވެ.
އޭގެ އިތުރުން އަލީ ފަޒާލް އާއި ރިޗާ ޗަދާގެ މިދިޔަ އަހަރު ކުރަން ހަމަޖެހިފައި އޮތް ކައިވެނި ވެސް ވަނީ ފަސްކޮށްފަ އެވެ. އެހެންކަމުން މި އަހަރު އެމީހުން ކައިވެނި ކުރާނެ ކަމަށް ބެލެވެ އެވެ.
