Advertisement

އަންނަ އަހަރުގެ ދައުލަތުގެ ބަޖެޓުގައި ގްރާންޓުގެ ގޮތުގައި ހޯދުމަށް ނިންމާފައިވާ 5 ބިލިއަން ރުފިޔާގެ ތެރެއިން 4 ބިލިއަން ރުފިޔާ އިންޑިއާއިން ހޯދަން ނިންމާފައި އޮތުމަކީ ކަންބޮޑުވާކަމެއްކަމަށް އޮޑިޓާ ޖެނެރަލް ހަސަން ޒިއަތް ވިދާޅުވެއްޖެއެވެ.

ޒިއަތު މިހެން ވިދާޅުވީ މިރޭ ރައްޔިތުންގެ މަޖިލީހުގެ ބަޖެޓު ދިރާސާ ކޮމެޓީގައި ވާހަކަ ދައްކަވަމުންނެވެ.

ޒިއަތު ވިދާޅުވީ ގްރާންޓުގެ ގޮތުގައި ހޯދާ ފައިސާގެ ބޮޑުބައެއް އިންޑިއާއިން ހޯދަން ބަޖެޓުގައި ހިމަނާފައިވާއިރު އެއްވެސް ސަބަބަކާ ހުރެ އެ ފައިސާ އިންޑިއާއިން ނުލިބިއްޖެނަމަ ދައުލަތުގެ ދަރަނި އަނެއްކާވެސް ބޮޑުވެގެންދާނެކަމަށެވެ.

އަންނައަހަރުގެ ބަޖެޓާއެކު ދައުލަތުގެ ދަރަނި 79 ޕަސަންޓަށް އަރާނެކަަން ވެސް އޮޑިޓާޖެނެރަލް ފާހަގަކުރެއްވިއެވެ.

"ފަސް ބިލިއަންތެރެއިން ހަތަރު ބިލިއަން މިއޮތީ އިންޑިއާއިން ހިލޭ އެހީއެއް ގޮތުގަ. މީގަ ފާހަގަކުރަންޖެހޭ ކަމަކީ މީގެ ކުރިން ވެސް ސަރުކާރަށް ގްރާންޓުގެ ގޮތުގަ ޖަހާފަހުރި ފައިސާ ރިއަލައިޒްއެއް ނުވޭ. މީގެ ސަބަބުން ދައުލަތުގެ ދަރަނި އިތުރުވެގެން ދާ މަންޒަރު،" ޒިއަތު ވިދާޅުވިއެވެ.

އަންނަ އަހަރަށް ލަފާކުރާ ދައުލަތުގެ ބަޖެޓުގެ ޖުމްލަ އަދަދަކީ 37.5 ބިލިއަން ރުފިޔާ އެވެ. އަންނަ އަހަރުގެ ބަޖެޓަށް އާމްދަނީއާއި ހިލޭ އެހީގެ ގޮތުގައި 29.9 ބިލިއަން ރުފިޔާ ލިބޭނެ ކަމަށް ލަފާކޮށްފައިވާއިރު އަންނަ އަހަރުގެ ބަޖެޓުން 35.6 ބިލިއަން ރުފިޔާ ހަރަދުވާނެ ކަމަށްވެސް ވަނީ ލަފާކޮށްފަ އެވެ. އެހެނެކްމުން އަންނަ އަހަރުގެ ބަޖެޓް ދަރަނި 5.6 ބިލިއަން ރުފިޔާ އަށް އަރާނެ ކަމަށްވެސް ވަނީ ލަފާކޮށްފަ އެވެ.

އަންނަ އަހަރުގެ ބަޖެޓަށް ފައިސާ ހޯދުމަށްޓަކައި ޖަޕާނަށް 300 މިލިއަން ޑޮލަރުގެ ބޮންޑެއް ވިއްކަން ނިންމާފައިވާއިރު 563 މިލިއަން ރުފިޔާގެ ޓީ-ބިލް ވިއްކުމަށްވެސް ވަނީ ނިންމާފަ އެވެ. އަދި އިތުރަށް އާމްދަނީ ހޯދުމަށްޓަކައި ބައެއް ކަހަލަ ޓެކްސްތައް ތައާރަފްކޮށް، ބައެއް ޓެކްސްތައް އިތުރުކުރުމަށްވެސް ވަނީ ނިންމާފަ އެވެ.