ރާޖް ކުމާރް ރާއޯ، ޕްރިޔަންކާ ޗޯޕްރާ ޖޯނަސް އަދި އަދަރްޝް ގޯރަވް ލީޑުން ފެންނަ ވައިޓް ޓައިގާ ނެޓްފްލިކްސްގައި ރިލީޒް ކުރިފަހުން 48 ގަޑިއިރު ވެފައިވާއިރު، މި ފިލްމުވަނީ ނެޓްފްލިކްސްގައި ރާއްޖޭގެ އެންމެ މަގުބޫލު 10 ފިލްމު/ސީރީޒްގެ އެއްވަނަ ސްލޮޓް ހޯދާފައެވެ.
މި ފިލްމަކީ 2008 ވަނަ އަހަރު އަރަވިންދް އަދިގާ ރިލީޒްކުރި ދަ ވައިޓް ޓައިގާ ވާހަކައިގެ މައްޗަށް ބިނާކޮށް އުފައްދާފައިވާ ފިލްމެކެވެ. އެގޮތުން މި ފިލްމުން ފެންނާނީ އިންޑިއާގެ މުއްސަނދި އާއިލާއެއްގެ ޑްރައިވަރެއް، އޭނާގެ ރަނގަޅު ވިސްނުމުގެ ބޭނުން ހިފާ، ފަގީރުކަމުން ސަލާމަތްވާ ގޮތެވެ. އަދި އޭނާ ބޮޑު ވިޔަފާރިވެރިއަކަށް ވުމަށް ކުރާ މަސައްކަތާއި، އެކަން ހާސިލު ކުރާ ގޮތެވެ.
މިހާރަށް މި ފިލްމަށް ނެޓްފްލިކްސްގައި 5/3 ގެ ރޭޓިންގް އެއް ލިބިފައިވާއިރު، ގިނަ ބަޔަކު އަންނަނީ މި ފިލްމުގައި އަދަރްޝްގެ އެކްޓިންގް ފާހަގަކޮށް، އޭނާއަށް ތައުރީފު ކުރަމުންނެވެ.
މި ފިލްމު ރިވިއު ކުރި ގިނަ ބަޔަކު ވަނީ މި ފިލްމުން 2008ގައި ރިލީޒްވި ފިލްމު "ސްލަމް ޑޯގް މިލިއަނާ"ގެ ސްޓޯރީ ލައިން ހަނދާން ކޮށްދޭ ކަމަށެވެ. މިއީ ބަލާލަން ރަނގަޅު ފިލްމަކަށް ވާނެއެވެ.
