ލިޔުންތެރިޔާ ޖޫލިއާ ކުއިންގެ ވާހަކަތަކެއްގެ މައްޗަށް ބިނާކޮށް އުފެއްދި މި ސީރީޒް ނެރުނުތާ ފުރަތަމަ 28 ދުވަހުގެ ތެރޭގައު 82 މިލިއަން ގޭބިސީން އެ ބެލި ކަމަށް ނެޓްފްލިކްސް އިން ވަނީ ބުނެފަ އެވެ.
އޭގެ އިތުރުން ނެޓްފްލިކްސް ލިބޭ ގައުމުތަކުގެ ތެރެއިން ޖަޕާނު ފިޔަވައި އެހެން ހުރިހާ ގައުމެއްގެ އެންމެ މަގްބޫލު 10 ޝޯގެ ތެރޭގައި "ބްރިޖަޓަން" ހިމެނިފައިވާ ކަމަށް ނެޓްފްލިކްސްގެ ބަޔާނެއްގައި ވެއެވެ.
އެއާއެކު 83 ގައުމެއްގެ އެންމެ މަގްބޫލު ޝޯއަކީ ވެސް "ބްރިޖަޓަން" ކަމަށާއި އޭގެ ތެރޭގައި އެމެރިކާ، އިނގިރޭސިވިލާތް، ބްރެޒިލް، ފްރާންސް، އިންޑިއާ އަދި ދެކުނު އެފްރިކާ ހިމެނޭ ކަމަށް ވަނީ ބުނެފަ އެވެ.
ރާއްޖޭގައި ވެސް ޒުވާނުންގެ މެދުގައި މި ސީރީޒް ވަނީ ހިޓުވެފަ އެވެ.
ކްރިސް ވޭން ޑުސެން ޑައިރެކްޓުކޮށް، ޝޮންޑާ ރައިމްސް ޕްރޮޑިއުސްކުރި މި ރޮމޭންސް ޑްރާމާ މިދިޔަ އަހަރުގެ ފަހުކޮޅު ރިލީޒްކުރުމާއެކު ގިނަ ބަޔަކު އަންނަނީ އެ ޝޯގެ ވާހަކަ ދައްކަވަމުންނެވެ.
އެއަށް ލިބުނު މަގްބޫލުކަމާއެކު ދެވަނަ ސީޒަނެއް މިހާރު ވަނީ ޔަގީންވެފަ އެވެ.
