މިޔަންމާގެ އަސްކަރީ ޓީވީން ބުނީ އެއް އަހަރު ވަންދެން ކުއްލި ނުރައްކަލުގެ ހާލަތު ތަންފީޒު ކުރަން ނިންމާފައިވާ ކަމަށާއި އަސްކަރިއްޔާއިން ބާރުތައް އަތުލާފައިވާ ކަމަށެވެ.
އެކަމާ ގުޅިގެން ނަޝީދު ވިދާޅުވީ ސޫ ކީގެ ޕާޓީން ނޮވެމްބަރުގެ އިންތިހާބު ކާމިޔާބުކޮށްް، މަޖިލިސް މެމްބަރުން މިއަދު ޖަލްސާތައް ފަށަން ތާވަލުކޮށްފައި އޮއްވާ މި ހިންގީ ލަދުވެތި އަމަލެއް ކަމަށެވެ.
"މިއީ ލަދުވެތި ކަމެއް - އެކަމަނާ [ސޫ ކީ] މިނިވަންކޮށް، މަޖިލިސް ޖަލްސާތައް ފަށަން ޖާގަދޭން ޖެހޭ،" ނަޝީދު ކުރެއްވި ޓްވީޓެއްގައި ވިދާޅުވި އެވެ.
ނަޝީދު އިތުރަށް ވިދާޅުވީ މިއަދު ހެނދުނު މިޔަންމާގައި ހިންގަމުންދާ ކަންކަމަކީ 7 ފެބްރުއަރީ، 2012 ގައި ރާއްޖޭގައި ހިނގި ކަންކަމާ ވަރަށް އެއް ގޮތް ކަންކަން ކަމަށެވެ.
"މިކަމުން އަންގައިދެނީ މުއައްސަސާތައް އިސްލާހު ކުރުމުގެ މުހިއްމު ކަމާއި ބަގާވާތް ރާވާ ބަގާވާތް ކުރާ މީހުންނާ މެދު ފާރަވެރިވުމުގެ މުހިއްމުކަން،" އެމަނިކުފާނު ވިދާޅުވި އެވެ.
ބަރުމާގެ ނަމުން ވެސް މަޝްހޫރު މިޔަންމާގައި 2011 ވަނަ އަހަރާ ހަމައަށް އޮތީ އަސްކަރީ ވެރިކަމެވެ. 2011 އަށް ފަހު އެ ގައުމަށް ޑިމޮކްރެޓިކް ބަދަލުތައް ގެންނަން ފެށި އެވެ.
މިއަދު ހެނދުނު އަސްކަރިއްޔާއިން ބުނީ ދެން ވެރިކަން ކުރާނީ ކޮމާންޑާ އިން ޗީފް މިން އޯންގް ލެއިންގް ކަމަށެވެ. އަދި އެއީ އިންތިހާބުގައި މަކަރު ހަދާފައި ވާތީ ކަމަށް ބުންޏެވެ.
މި ވަގުތު މިޔަންމާގެ ވެރިރަށް ނޭ ޕީ ޓޯ އާއި ޔެންގޯން ސިޓީގެ މަގުތަކުގައި ވެސް ގިނަ އަދަދެއްގެ ސިފައިން ދަނީ ހަރަކާތްތެރިވަމުންނެވެ.
މިދިޔަ ނޮވެމްބަރު މަހު އޮތް އިންތިހާބުގައި ސޫ ކީގެ ނޭޝަނަލް ލީގް ފޯ ޑިމޮކްރަސީ ޕާޓީން ވަނީ ސަރުކާރެއް އުފެއްދޭ ވަރަށް މަޖިލީހުގެ ގޮނޑި ކާމިޔާބުކޮށްފަ އެވެ.
