ކްލަބު ވެލެންސިޔާގެ ކުޅުންތެރިއަކު ޕޮޒިޓިވްވީ ކަމުގެ މައުލޫމާތު މި ލިބުނީ، ރައްކާތެރިކަމުގެ ފިޔަވަޅެއްގެ ގޮތުން މެދުކަނޑާލާފައިވާ ދިވެހި ލީގުގެ ކުޅުން އަލުން ފެށުމަށް އެފްއޭއެމުންނާއި ކްލަބުތަކުން އެޗްޕީއޭއަށް ޕްރެޝަރުކުރަމުން އަންނަނިކޮށެވެ. އެފްއޭއެމްގެ ރައީސް ބައްސާމް އަދީލް ޖަލީލް، އަދި އެއްވަނަ ޑިވިޝަނުގެ ޓީމުތަކުން އަންނަނީ ލީގުގެ ކުޅުން މެދު ކަނޑާލުމާއެކު އެ ނިންމުން ބަދަލު ކުރުމަށް ޕްރެޝަރު ކުރަމުންނެވެ.
ވެލެންސިޔާ ކުޅުންތެރިއަކާ ޔުނައިޓެޑް ވިކްޓަރީގެ ތިން ކުޅުންތެރިން ކޮވިޑަށް ޕޮޒިޓިވްވެފައިވާއިރު، ދިވެހި ލީގުގައި ވާދަކުރާ ކުލަބެއްގެ ހެޑް ކޯޗުވެސް އައިސޮލޭޓްކޮށްފައިވާ ކަމަށް މައުލޫމާތު ލިބިފައިވެއެވެ. އަދި އެހެން ކްލަބެއްގެ ދެ އޮފިޝަލަކު ވެސް އައިސޮލޭޓްކޮށްފައިވާ ކަމަށް މައުލޫމާތު ލިބިފައިވެއެވެ.
ކޮވިޑާ ގުޅިގެން ދިވެހި ލީގުގެ ކުޅުން މެދުކަނޑާލީ މިދިޔަ ހަފުތާ ތެރޭގައެވެ. މެދުކަނޑާލަން ޖެހުނީ އެޗްޕީއޭއިން އާއްމު ކުރި އުސޫލުގައިވާ ގޮތުން އެކަނި ކުރާ ކަސްރަތުތައް ފިޔަވައި، ކުޅިވަރު ހަރަކާތްތަކާއި ކަސްރަތު ހަރަކާތްތައް ހުއްޓާލަން ޖެހުމުންނެވެ. އެޗްޕީއޭއިން އުސޫލުތައް ހަރުކަށި ކުރަން ޖެހުނީ މާލެ ސަރަހައްދުގައި ކޮވިޑަށް ޕޮޒިޓިވްވީ މީހުންގެ އަދަދު ދުވާލެއްގެ މައްޗަށް ސަތޭކައަށްވުރެ އިތުރު ވެގެން ދިޔުމުންނެވެ.
