ދިވެހިރާއްޖޭގައި ހުންނަ އިންޑިއާގެ ހައިކޮމިޝަނުން މިހެން ބުނެފައިވަނީ، އިންޑިއާއިން ރާއްޖޭގެ އަސްކަރިއްޔާ ވަރުގަދަކުރަން ދިން 50 މިލިއަން ޑޮލަރުގެ ޑިފެންސް އެލްއޯސީ އާއި ބެހޭގޮތުން މިއަދު ޑިފެންސް މިނިސްޓަރު މާރިޔާ އަހުމަދު ދިދީއާ، އަސްކަރިއްޔާގެ އިސްވެރިންނާއި އިންޑިއާގެ ހައިކޮމިޝަނުގެ އިސް ވެރިން ބައްދަލުކުރައްވައި މަޝްވަރާ ކުރުމަށްފަހުއެވެ.
ޑިފެންސް ދާއިރާއިން މާލީ އެހީތެރިކަން ދިނުމާގުޅޭ 50މިލިއަން ޑޮލަރުގެ ކްރެޑިޓް ފެސިލިޓީއެއްގައި ދިވެހިރާއްޖެއާއި އިންޑިއާ ދެމެދު ސޮއިކޮށްފައިވަނީ އިންޑިއާގެ ފޮރިން މިނިސްޓަރު ޑރ.އެސް ޖައިޝަންކަރް ދިވެހިރާއްޖެއަށް ކުރެއްވި ދަތުރުފުޅުގައެވެ.
މި ކްރެޑިޓް ފެސިލިޓީއަކީ އިންޑިއާގެ އެކްސްޕޯޓް އިންޕޯޓް ބޭންކް އޮފް އިންޑިއާ ނުވަތަ އެގްޒިމް ބޭންކް މެދުވެރިކޮށް ދޭ ލޯނެކެވެ.
މި 50 މިލިއަން ޑޮލަރުގެ ކްރެޑިޓް ފެސިލިޓީގެ އެއްބަސްވުމުގައި ދިވެހިރާއްޖޭގެ ފަރާތުން ސޮއިކުރެއްވީ މިނިސްޓަރ އޮފް ފިނޭންސް އިބްރާޙިމް އަމީރުއެވެ. އެކްސްޕޯޓް އިންޕޯޓް ބޭންކް އޮފް އިންޑިއާ (އެގްޒިމް ބޭންކް)ގެ ފަރާތުން ސޮއިކުރެއްވީ ޗީފް ޖެނެރަލް މެނޭޖަރ ޝްރީ ގޯރަވް ސިންގް މަންދާރީއެވެ.