ސީއެންއެމްގެ އިތުރުކާފު ޕްރޮގްރާމުގައި ވާހަކަ ދައްކަވަމުން، މަލީހު ވަކިކުރީ ކޯލިޝަން އެއްބަސްވުމާއި ދެކޮޅަށް ކަމަށް ބުނާ ބުނުމަށް ރައްދު ދެއްވަމުން، ގާނޫނު އަސާސީއަށް ވުރެ މަތިން އެއްވެސް ކޯލިޝަން އެއްބަސްވުމެއް ނެހެދޭނެ ކަމަށް މީކާއިލް ވިދާޅުވެފައިވެ އެވެ.
މީކާއީލް ވިދާޅުވީ ވަޒީރުންގެ މަޖިލީހުގައި ހިމެނޭ ވަޒީރުން، އެ ވަޒީރުންގެ މަސައްކަތްތަށް ރަނގަޅަށް ނުކުރާނަަމަ ނުވަތަ އެ ވަޒީރެއްގެ އިތުބާރު ނެތް ކަމަށް މަޖިލީހުގެ މެމްބަރުންނަށް ފެންނަ ނަމަ، އެ ވަޒީރަކު މަގާމުން ވަކިކުރުމަކީ ގާނޫނު އަސާސީން ރައްޔިތުންގެ މަޖިލީހަށް ދީފައިވާ ބާރެއް ކަމަށެވެ. އަދި މިފަދަ ހާލަތެއްގައި، ކޯލިޝަން އެއްބަސްވުމަކަށް ރިއާޔަތްކޮށް، ގާނޫނު އަސާސީ "އޯވާރައިޑު" ނުކުރެވޭނެ ކަމަށް މީކާއިލް ވިދާޅުވިއެވެ.
މީގެ އިތުރުން މަލީހު މަގާމުން ދުރު ކުރުމަކީ އެމްޑީޕީން ކުރާ "ފިނޑި" އަމަލެއް ކަމަށް ޖުމްހޫރީ ޕާޓީން ބުނާ ބުނުމަށް މީކާއިލް ރައްދު ދެއްވާފައިވެއެވެ.
މީކާއިލް ވަނީ މިއަދުގެ ޖަލްސާގައި ގާސިމް ވެސް ބައިވެރިވެވަޑައި ނުގަންނަވާކަން ފާހަގަ ކުރައްވާފައެވެ. އަދި މަލީހަކީ ޖޭޕީން "ޑިފެންޑު" ކުރައްވަން ބޭނުންވާ ބޭފުޅެއްނަމަ، މިއަދުގެ ޖަލްސާގައި ޖޭޕީގެ މެމްބަރުން ބައިވެރިވެ މަޖިލީހުގެ ބަހުސްގައި ބައިވެރިވެ ވަޑައިގެންނެވީސް ކަމަށް މީކާއިލް ވިދާޅުވިއެވެ.
މީގެ އިތުރުން ބަޔާން ނެރޭނީ ފަހު މިނެޓުގައި ނޫން ކަމަށް މީކާއިލް ވިދާޅުވިއެވެ. އަދި އެމްޑީޕީގެ ޕީޖީގައި މި ޑެލިބިރޭޝަންތައް ކުރިއަށް ގެންދިޔައިރު ޖޭޕީން ރައީސުލްޖުމްހޫރިއްޔާއާއި ބައްދަލު ކޮށްފައިނުވުމުން ގަބޫލު ކުރެވެނީ ގާސިމް ބޭނުންފުޅުވީ މަލީހު ބޭރުކުރަން ކަމަށް މީކާއިލް ވިދާޅުވިއެވެ.
