ސްރީލަންކާގެ ނޫހެއް ކަމަށްވާ "ދަ މޯނިން" ގައި އެގައުމުގެ ފުލުހުންނާއި ހަވާލާދީ ބުނެފައިވަނީ، ފުލުހުން ހިންގި ހާއްސަ އޮޕަރޭޝަނެއްގެ ދަށުން، ވިސާ ނެތި އެގައުމުގައި އުޅެމުންދިޔަ ބަޔަކު ހައްޔަރުކޮށްފައިވާ ކަމަށާއި، އޭގެތެރޭގައި ހަތަރު ދިވެހިން ހިމެނޭ ކަމަށެވެ.
މީގެ އިތުރުން އެމީހުން ހައްޔަރުކޮށްފައިވަނީ، ދެހިވަލާ، މައުންޓް ލެވީނިއާ، މޮރަތުއާ، އަދި ސްލޭވް އައިލެންޑް އެންޑް ގްރޭންޑްޕާސް އިން ކަމަށްވެސް ވަނީ ބުނެފައެވެ.
މިކަމާއި ގުޅިގެން ރާއްޖޭގެ ފޮރިން މިނިސްޓްރީން މިހާތަނަށް ބުނެފައިވަނީ، ލަންކާ ސަރުކާރާއި ގުޅިގެން މިނިސްޓްރީގެ ފަރާތުން ކުރަންޖެހޭ ކަންކަން މިހާރު ކުރަމުން އަންނަ ކަމަށެވެ. އަދި ފޮރިން މިނިސްޓްރީން ވަނީ، އެކި ގައުމުތަކުގެ ދިރިއުޅޭ ދިވެހިން، އެގައުމުތަކުގެ ގާނޫނުތަކާއި ގަވާއިދުތަކަށް އިހުތިރާމުކޮށް އެކަންކަން ފުރިހަމައަށް އަދާކުރުމަށް ނަސޭހަތްތެރިވެފައެވެ.
