ސަރުކާރު ބަދަލުވީއިރު ކުރީގެ ހައުސިން މިނިސްޓަރު ޑރ. މުހައްމަދު މުއިއްޒުގެ ވުޒާާއިން ބަލަމުންދިޔަ މާލޭ ސިޓީ ކައުންސިލްގެ ކަންކަން ހުރިގޮތުގެ ތަފްސީލް ކަމަށް ވިދާޅުވެ، ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ޓްވީޓާގައި ހިއްސާކޮށްފައިވާ ވޯޑިއޯގައި މޭޔަރު ޝިފާ ވަނީ ދައުލަތުގެ މުދަލަށް ގެއްލުން ދީފައިވާ ކަމަށް ވިދާޅުވެ، އެއިދާރާގެ މުދާތަކެއް ގުދަން ކޮށްފަ ހުރި ތަން ދައްކާލާފައެވެ.
މޭޔަރު ޝިފާ ވިދާޅުވީ، މި ސަރުކާރުން ސިޓީ ކައުންސިލާއި ހަވާލުވީންސުރެ ކައުންސިލްގެ ކަންބޮޑުވުމުގެ ވާހަކައާއި ކުރީ ސަރުކާރުގެ ކަންތައްތައް ހުރި ގޮތުގެ ވާހަކަތައް ތަކުރާރުކޮށް ދައްކަމުން ގެންދެވިންކަމަށެވެ.
ޝިފާ ވިދާޅުވީ، އެއީ ހަމަ ސީދާ ދައުލުތުގެ މުދަލަށް ގެއްލުން ދިނުން ކަމަށެވެ. ޝިފާ ވަނީ މާލެ ރައްޔިތުންގެ ގޯތިތަކުގެ ޗާޓަރުތަކާއި، ބިމުގެ ޗާޓަރުތައް ނެރެ މަގަށް އުކާލި މީހާ މާލެ އަށް ކުރިމަތިލައިފި ކަމަށާއި، "ރުއްގަސް ބުޑަށް ލޮނުއަޅާ ބިއްލޫރިގެއިން ދަމާ ބޭރުކުރި ގޮތަށް އަދިވެސް މިތިބީ ބިމެއް ނުލިބި ތަނެއްގަ ކުއްޔަށް" ކަމަށް މީގެ ކުރިންވެސް ވިދާޅުވެފައެެވެ.
ރައީސް ނަޝީދު ޑރ. މުއިއްޒުއަށް ނިސްބަތްވާ ގޮތަށް މިފަދަ ވީޑިއޯއެއް ހިއްސާކުރައްވާފައިވާއިރު، އަންނަ އެޕްރީލް މަހުގެ 10 ވަނަ ދުވަހު ބޭއްވުމަށް ނިންމާފައިވާ ލޯކަލް ކައުންސިލް އިންތިހާބުގައި އިދިކޮޅު ކޯލިޝަންގެ ފަރާތުން މާލޭ ސިޓީގެ މޭޔަރު ކަމަށް ޑރ. މުއިއްޒު ވަނީ ކުރިމަތި ލައްވާފައެވެ. އަދި އެމްޑީޕީގެ ޓިކެޓްގައި އަނަސް އަބްދުއް ސައްތާރު ކުރިމަތިލައްވާފައިވާއިރު، ދެ ޕާޓީންވެސް ދަނީ އިންތިހާބަށް ވާދެވެރި ކަމާއިއެކު ކެމްޕެއިން ކުރައްވަމުންނެވެ.
