ބައިނަލްއަގްވާމީ އަންހެނުންގެ ދުވަހުގެ މުނާސަބަތުގައި މި ސީރީޒް ނެޓްފްލިކްސްގައި ރިލީޒް ކޮށްފައިވަނީ އިއްޔެއެވެ. އެއާއެކު ގިނަ ބައެއްގެ ފާޑުކިއުންވެސް މި ސީރީޒްއަށް ވަނީ ކުރިމަތިވެފައެވެ.
ބޮމްބޭ ބޭގަމްސްއަކީ އިންޑިއާގެ އެންމެ މީހުންގިނަ އެއް ސިޓީ ކަމަށްވާ ބޮމްބޭގައި ދިރިއުޅެ ފަސް އަންހެނުންގެ ވާހަކަ ގެނެސްދޭ ސީރީޒް އެކެވެ. މި ފަސް އަންހެނުންގެ ދިރިއުޅުން އެކެއް އަނެކާގެ ދިރިއުޅުމާ ގުޅިލާ މެހިފައިވާއިރު، ވަކިވަކި މީހުންގެ ދިރިއުޅުމުގައި ދިމާވާ އެކި ދަތިތައްވެސް މި ސީރީޒްގައި ދައްކައެވެ.
ހަ އެޕިސޯޑު ހިމެނޭ މި ސީރީޒްގައި އަނބިމީހާ އާއި ފިރިމީހާ އާއި ދެމެދު ޖެހޭ މައްސަލަތަކާ، މަންމައާއި ފުރާވަރުގެ އަންހެން ކުއްޖަކާ ދެމެދުގެ މައްސަލަތަކުގެ އިތުރުން އެއް އަންހެނަކާ އެހެން އަންހެނަކާ ދެމެދު ޖެހޭ އެކި މައްސަލަތައް ފެނިގެންދާ ސީރީޒްއެކެވެ.
މި ސީރީޒް ބެލި ގިނަ ބަޔަކު މިއީ އަންހެނުން "ބާރުވެރި" ކުރުމުގެ ވާހަކަތަކަށް އަލިއަޅުވާލާ ސީރީޒްއެއްކަން ފާހަގަ ކުރާއިރު، ގިނަ ބަޔަކު އަންނަނީ ޕޫޖާ ބަޓްގެ ކެރެކްޓަރަށް ތައުރީފު ކުރަމުންނެވެ.
ގިނަ ދުވަހަށްފަހު ޕޫޖާ އަލުން ސްކްރީނުން ފެނިގެން ދިޔަ އިރު، މި ސީރީޒްގައި އޭނާ ކުޅެނީ ވަރުގަދަ އަންހެން ޝަހުސިއްޔަތެއްގެ ރޯލެވެ. އެގޮތުން ޕޫޖާގެ ރޯލަކީ ބޮޑު ކުންފުންޏެއްގެ ސީއީއޯއެއްގެ މަގާމެވެ.
