ކުރީގެ ހައުސިން މިނިސްޓަރު ޑރ. މުއިއްޒު އަށް ތާއީދުކުރައްވާ މިމަހުގެ ހަވަނަ ދުވަހު ދުންޔާ ވިދާޅުވެފައިވަނީ، މާލޭގެ މޭޔަރު ކަމަށް ކުރިމަތިލައްވާފައިވާ ފަރާތްތަކުގެ ތެރެއަން، ޑރ. މުއީޒަކީ، މާލޭގެ ރައްޔިތުންގެ ކަނބޮޑުވުންތަކާއި އިހުސާސްތައް އަޑުއަހާނެ ބޭފުޅެއް ކަމަށެވެ. އަދި އެމަނިކުފާނަކީ "ސަރުކާރުގެ ޕަޕެޓަކަށް ނުވާނެކަމުގެ ޔަގީންކަން އޮތް، ބޯހިޔާވަހިކަމުގެ ހައްގު ހޯދައިދިނުމަށް މަސައްކަތްކުރާނެ ގާބިލް ހާދިމެއް" ކަމަށް ދުންޔާ ވިދާޅުވިއެވެ.
އޭގެ ފަހުން މިއަދު އެކަމަނާއާއި އެއްމާބަނޑު އަދި މިހާރު އެމްޑީޕީ ސަރުކާރުގެ މިނިސްޓަރުކަންވެސް ކުރައްވަމުން ގެންދަވާ ޔުމްނާ ވިދާޅުވީ، މާލޭ މޭޔަރު ކަމަށް އެކަމަނާ ތާއީދު ކުރަނީ، އެމްޑީޕީގެ ޓިކެޓުގައި ވާދަކުރައްވާ އަނަސް އަށް ކަމަށެވެ.
ލޯކަލް ކައުންސިލް އިންތިހާބުގައި މާލޭގެ މޭޔަރު ކަމަށް ކުރިމަތިލައްވާފައިވާ ފަރާތްތަކުގެ ތެރެއިން، އަނަސްއަށް ޔުމްނާ ތާއިދު ކުރައްވާފައިވާއިރު އެކަމަނާއަކީ، މިހާރު ސަރުކާރުގައި ހެރިޓޭޖް މިނިސްޓަރުކަން ކުރައްވަމުން ގެންދަވާ ބޭފުޅެެކެވެ. އަދި 2018 ވަނަ އަހަރުގެ ރިޔާސީ އިންތިހާބުގައި ބައްޕާފުޅު އަދި ކުރީގެ ރައީސް މައުމޫން އަބްދުﷲ ގައްޔޫމް އާއިއެކު އެކަމަނާ ހުންނެވީ އެމްޑީޕީއާއި އެކުއެވެ. އެކަމަނާ ވަނީ އޭރު ރައީސް ޔާމީންގެ ވެރިކަމުގައި ބައްޕާފުޅު ޖަލުގައި ބަންދުކުރެއްވުމުން އެމަނިކުފާނު މިނިވަން ކުރެއްވުމަށްވެސް ކޯލިޝަންތެރެއިން ގިނަ މަސައްކަތްތަކެއް ކުރައްވާފައެވެ.
އަދި ކައުންސިލް އިންތިހާބުގައި މާލޭގެ މޭޔަރު ކަމަށް ކުރިމަތިލައްވާފައިވާ ފަރާތްތަކުގެ ތެރެއަން، ޑރ. މުއިއްޒުއަށް ދުންޔާ ތާއިދު ކުރައްވާފައިވާއިރު އެކަމަނާއަކީ، ކުރީގެ ރައީސް ޔާމީންގެ ވެރިކަމުގައި ފޮރިން މިނިސްޓަރުކަން ކުރައްވާފައިވާ ބޭފުޅެެކެވެ. އަދި 2018 ވަނަ އަހަރުގެ ރިޔާސީ އިންތިހާބުގައި ބައްޕާފުޅު އަދި ކުރީގެ ރައީސް މައުމޫން އަބްދުﷲ ގައްޔޫމް، އިދިކޮޅު އެމްޑީޕީއަށް ތާއީދުކުރެއްވި އިރުވެސް ދުންޔާ ހުންނެވީ ރައީސް ޔާމީންގެ ފަހަތްޕުޅުގައެވެ.
ސިޔާސީ މަޝްރަހްގައި މިނިސްޓަރު ޔުމްނާ އަދި ދުންޔާ ފާހަގަކުރެވެނީ ހިޔާލު ތަފާތު ދެކަނބަލުންގެ ގޮތުގައެވެ.
