މަލޭ ސިޓީގެ ފަޅުތަކާއި ބަނދަރުތަކަށް ދިމާވާ މައްސަލަތަކަށް ވާހަކަދައްކަވަމުން ޑރ. މުއިއްޒު ވިދާޅުވީ މާލޭ ސިޓީ ހިމެނޭ ސަރަހައްދުގެ ހުޅުމާލެ އަދި ވިލިމާލޭގެ އިތުރުން މާލޭގެ ފަޅުތެރެ ބެލެހެއްޓުމާއި މެނޭޖްކުރުން ވަރަށް ބޮޑަށް މިހާރުގެ ސިޓީ ކައުންސިލުން ދޫކޮށްލާފައިވާ ކަމަށެވެ. އެގޮތުން އެފަދަ ތަންތަން ދާއިމީކޮށް ރަނގަޅު ފެންވަރެއްގައި ބެލެހެއްޓޭ ތަން ނުފެންނަ ކަމަށާއި، ބައެއް ދުވަސްވަރުގައި ރަނގަޅު ވާތަން ފެނުނު ނަމަވެސް އެކަން ދާއިމީ ގޮތެއްގައި ނުފެންނަ ކަމަށް ވިދާޅުވިއެވެ.
މީގެ އިތުރުން ޑރ. މުއިއްޒު ވަނީ، ދަތުރުވެރިން ދަތުރުތައް ކުރުމަށް މާލޭ ސިޓީގައި ބޭނުންކުރަމުންދާ ބަނދަރުތަކުގައި ހުރި މައްސަލަތަކަށް ހައްލު ގެނެވިދާނެކަން ފާހަގަކުރައްވާފަ އެވެ. އެގޮތުން ތިން ބަނދަރު އޮންނައިރު، އެކަށީގެންވާ ގޮތަކަށް އިންތިޒާމްތައް ހަމަޖެއްސިއްޖެނަމަ ހައްލުތަކެއް ލިބިގެންދާނެ ކަމަށް ވިދާޅުވިއެވެ.
ޑރ. މުއިއްޒު ވިދާޅުވީ ކުރިން އެމަނިކުފާނުގެ ވަޒީރުކަމުގެ ތެރެއިން އެގޮތަށް ހުންނަ އުޅަނދު ފަހަރުތައް ފުލުހުންނާއި ގުޅިގެން ތިލަފުއްޓަށް ބަދަލުކޮށްފައިވާނެ ކަމަށެވެ. އެހެންކަމުން މަގުމަތީގައި ވެސް ބާދަގަނޑަށްވާން ދޫކޮށްލާފަ ހުންނަ އުޅަނދުތައް ނަގާ ނައްތާލުމާއި ބަނދަރާއި ފަޅުތެރޭ ހުންނަ އެފަދަ އުޅަނދުތައް ވެސް ނައްތާލަން ޖެހޭނެ ކަމަށް ޑރ. މުއިއްޒު ވިދާޅުވި އެވެ.