ސައީދު މިހެން ވިދާޅުވީ، ކުރީގެ ޓޫރިޒަމް މިނިސްޓަރު އަލީ ވަހީދު ރާއްޖެއިން ބޭރަށް ފުރި މައްސަލާގައި ރައްޔިތުންގެ މަޖިލީހުގެ ޖުޑީޝަރީ ކޮމިޓީން އެކުލަވާލާފައިވާ ރިޕޯޓާއި ގުޅޭގޮތުން ވާހަކަ ދައްކަވަމުންނެވެ.
ސައީދު ވިދާޅުވީ، އަލީ ވަހީދު ފުރުވާލީ ސީދާ ރައީސް އިބްރާހިމް މުހައްމަދު ސޯލިހު ކަމަށާއި، އަލީ ވަހީދުއަށް ސަރުކާރުން ޓިކެޓު ނަގައިދިނީވެސް ސީދާ ރައީސް ސޯލިހުގެ އެންގުމަށް ކަމަށެވެ.
ސައީދު ވިދާޅުވީ އެކަން ކުރުމަށްފަހު މިއަދު އެކަން ތަހުގީގު ކުރުމަށް ކަމަށް ބުނެ ރިޕޯޓެއް އެކުލަވާލުމުން، ގާނޫނު އަސާސީގައި ލަދު ކިޔާ މާއްދާއެއް އޮތްނަމަ މިއަދު އެކަން ރައްދުވާ ބަޔަކީ އެމްޑީޕީ ކަމަށެވެ. އަދި ސަބަބަކީ މިމައްސަލާގެ އުންސުރު ހަމަ ކުއްލިއަކަށް ހަމަޖެހުމުން ކަމަށްވެސް ސައީދު ވިދާޅުވިއެވެ.
ސައީދު ވިދާޅުވީ، މިއީ ދައުލަތުން ހިންގާ ބޮޑެތި ވައްކަން ކަމަށާއި، މިއީ "ވަގު" ސަރުކާރެއް ކަމަށެވެ. މިހެން ވިދާޅުވަމުން ސައީދު ވަނީ އަލީ ވަހީދު ފުރުވާލުމަށްފަހު ދިވެހި ކަނބަލުންގެ މޫނުގައި "ތިޔަ ޖެއްސެވީ" ނޫންތޯ ސުވާލު އުފައްދަވާފައެވެ.
ސައީދު ވިދާޅުވީ، އެމްޑީޕީން އަންނަނީ ހުރިހާ ބާރެއް އެއްކޮށްލައިގެން މުޅި ގައުމު ފަސާދަ ކުރަމުން ކަމަށެވެ.
