އެގޮތުން މާލޭގެ އެކި ސަރަހައްދުގައި ހައްދާފައިވާ މަޑިމަސްވަކަރު ގަސްތައް ވަނީ މަލުން ފުރި ބާރާވެފަ އެވެ. އެގަސްތަކުގައި މާ އަޅާފައިވާއިރުގައި ހީވަނީ ޖަޕާނުގެ ޗެރީ ބްލޯސަމް ގަސްތަކެއްހެން ކަމަށް ގިނަ ބަޔަކު ސިފަ ކުރެއެވެ.
އަދި އެ ރީތި މަޑުފިޔާދޮށި ކުލައިން ޖަރީވެފައިވާ ގަސްތަކުގެ ފޮޓޯނަގަން ގިނަ ބަޔަކު އެގަސްތައް ހުންނަ ސަރަހައްދަށް އެއްވާ މަންޒަރުވެސް ފެނެ އެވެ.
ބައެއް މީހުން ބުނަމުންދަނީ އެ ގަސްތައް ހިމާޔަތް ކުރުމަށެވެ. އަދި މާލޭގެ ގިނަ ސަރަހައްދުތަކުގައި އެ ގަސްތައް އިންދުމަށެވެ.
މީގެ އިތުރުން ވެސް މީހުންގެ ސަމާލުކަން އަތުލާފައިވަނީ ހުޅުމާލޭގައި ހައްދާފައިވާ ރީންދޫކުލައިގެ މާ އަޅާ ގަސަތަކަށެވެ. މަގުގެ އެއްފަރާތުން އަނެއް ފަރާތަށް އެގަސްތައް އިންދާފައިވާއިރުގައި ރީންދޫ ކުލައިގެ ވެޔޮގަނޑެއްހެން އެލިފައިވާ މާތަކުން ވެސް ގިނަ ބައެއްގެ ހިތްތަކަށް ވަނީ ހިތްހަމަ ޖެހުން ގެނެސްދީފަ އެވެ.
އެމާތަކުގެ ފޮޓޯތައްވެސް ދަނީ ސޯޝަލް މީޑިއާގައި ދައުރުވަމުންނެވެ. އަދި އެކަން ގިނަ ބައެއްގެ ސަމާލުކަމަށް ވެސް ވަނީ އައިސްފަ އެވެ.
ހުޅުމާލޭގައި ހައްދާފައި ހުރި ރަތްކުލައިގެ ބޮޑެތި މާއަޅާ ގަސްތަކުގެ ރީތިކަމުގެ ވާހަކަ ނުދެއްކިއްޔާ ދެރަ އެވެ. އެ ގަހުން މުޅިތަން ހިޔާވެފައި އޮންނަ އިރުގައި މުޅި ގަސްދޮށަށް އޮންނަނީ ރަތްކުލައިގެ ކުދިކުދި ފިޔަތަށް ވެރިފަ އެވެ.
އެމަންޒަރު ފެންނަ ކޮންމެ މީހަކު އާޝޯހު ވެގެން ދެއެވެ.
ކޮންމެއަކަސް މާލޭ ސަރަހައްދުގައި ހައްދާފައިވާ ގަސްތަކުގައި ޖަރީވެފައިވާ ރީތި އެކި ކުލަކުލައިގެ މާގަސްތަކުން މާލޭ ސިޓީގެ ރީތިކަން އިތުރަށް ފުރިހަމަކޮށްދީފި އެވެ.