ސެރޭނާ ރާއްޖޭގައި މަސައްކަތް ކުރާތާ މިހާރު 20 އަހަރު ވެފައި ވާއިރު އޭނާއަށް ދިއްގަރު ރިހާކުރު ވަނީ ވަރަށް ކަމުގޮސްފައެވެ.

 މިކަން ހާމަވެގެން ގޮސްފައި ވަނީ ދިއްގަރު ދާއިރާގެ މެމްބަރު އިކްރާމް ހަސަން ކުރެއްވި ވީޑިއޯ ޓްވީޓެއްގައެވެ. 

މި ވީޑިއޯގައި ސެރޭނާ ބުނެފައި ވަނީ ދިވެހި ރިހާކުރަކީ އޭނާއަށް ވަރަށް ކަމުދާ އެއްޗެއް ކަމަށާއި، އޭނާ އާންމު ގޮތެއްގައި މި ރިހާކުރު ގަންނަނީ އެންޒީ އިން ކަމަށެވެ. 

ނަމަވެސް ދިއްގަރު ރިހާކުރަކީ އެހެން ރިހާކުރު ތަކާއި ތަފާތު އެއްޗެއް ކަމަށާއި، އޭނާ އަށް ފުރަތަމަ ދިއްގަރު ރިހާކުރު ލިބުނީ މެމްބަރު އިކްރާމްގެ އޮފީހުން ކަމަށް ވެސް އޭނާ ބުންޏެވެ. 

އެހެން ދިއްގަރު ރިހާކުރު އިޓަލީ ވިލާތުގައި އިޝްތިހާރުކޮށް، މާކެޓް ކުރެވޭނެ ގޮތެއް ހޯދަމުންދާ ކަމަށް ވެސް އޭނާ ވަނީ މި ވީޑިއޯގައި ބުނެފައެވެ. 

ރިހާކުރަކީ ދިވެހިންގެ އާންމު ކެއުމުގައި ބޭނުން ކުރާ ދިވެހީންގެ ހާއްސަ އުފެއްދުމެއް ކަމުގައި ވާއިރު، ދިއްގަރު ރިހާކުރަކީ ދިވެހީންގެ ތެރޭގައި ވެސް އޭގެ ރަހައިގެ ތަފާތު ކަމާއި، މީރު ކަމަށް މަޝްހޫރު ވެފައި އޮންނަ ރިހާކުރެކެވެ.