އެމްއެމްޕީއާރްސީގެ މައްސަލާގައި ފަސް އަހަރުގެ ޖަލު ހުކުމެއް މިވަގުތު ވެސް ތަންފީޒް ކުރައްވުމަށް މާފުށީ ޖަލުގައި ހުންނެވި ކުރީގެ ރައީސް ޔާމީންގެ މި މެސެޖު ފަށަމުން ވިދާޅުވެފައިވަނީ، މާފުށީ ޖަލުގެ ކުޑަގޮޅިން ބައްދަލުކުރަނީ ގައުމުގެ ހާލަތާއިމެދު އިންތިހާއަށް ކަންބޮޑުވެ، ދެރަވާ ހާލުގައި ކަމަށެވެ.
އެޔަށްފަހު ރައީސް ޔާމީންގެ ވިދާޅުވެފައިވަނީ، 2013ވަނަ އަހަރު ރާއްޖޭގެ ޒައާމަތާއި އެމަނުކުފާނު ހަވާލުވެ، ރާއްޖޭގެ އިގްތިސޯދު ކޮޅަށް ޖަހައިދިނިން ކަމަށާއި ހައްލުނުކުރެވޭނެ ކަމަށް ގިނަ ބަޔަކު ގަބޫލްކޮށްގެން ތިބި ގައުމީ މަސްލަހަތާއި ގުޅުންހުރި މައްސަލަތައް ހައްލުކޮށްދިނިން ކަމަށެވެ. އަދ ފުރިހަމަ ސިޔާދަތާއި މިނިވަންކަމުގައި އޮތް ރައްޔިތުން ފަހުރުވެރިވާފަދަ ގައުމަކަށް ރާއްޖެ ހަދައިދިނިންކަމަށްވެސް އެމަނިކުފާނު ވިދާޅުވިއެވެ. އެހެން ނަމަވެސް އެކަންކަމުގެ ނަތީޖާއަކަަށްވީ ވާދަވެރި ސިޔާސީ ފަރާތްތަކާއި އެބޭފުޅުންނަށް ވާދަވެރިވާ ބޭރުގެ ބަޔަކާއި ގުޅިގެން އެމަނިކުފާނު ޖަލަށްލުން ކަމަށް ރައީސް ޔާމީން ވިދާޅުވިއެވެ.
ރައީސް ޔާމިން ވިދާޅުވީ ރައްޔިތުންނާއި ދުރުުގައި އެކަހެރިކޮށް ޖަލެއްގައި އެމަނިކުފާނު ބަންދުކޮށްގެން މި ސަރުކާރުން ގެންގުޅެމުންދަނީ ޕީޕީއެމް ޕީއެންސީގެ ފިކުރު ދެކެ ބިރުންކަމަށާއި، ހިތަވަރު ބަލިކޮށްލެވޭނެ ކަމަށް ހީކޮށްގެން ކަމަށެެވެ. އެހެންނަަމަވެސް އެމަނިކުފާނަކީ އެފަދަ ބޭއިންސާފުގެ ކުރިމަތީގައި ކުޑަކަކޫ ޖަހާނެ މީހެއް ނޫން ކަމަށާއި، އަމިއްލަ ހިތްހަމަޖެހުމާއި އުފަލަށްވުރެ އެމަނިކުފާނު އަބަދުވެސް އިސްކުރާނީ ދިވެހި ރައްޔިތުންގެ މަސްލަހަތާއި މިނިވަންކަމަށް ކަމަށް ރައީސް ޔާމީން ވިދާޅުވިއެވެ.
އަދި އެމަނިކުފާނު ވިދާޅުވީ ބޭރު މީހުން ރާއްޖޭގެ ދާހިލީ ކަންކަމުގެ ތެރެއަށްވަދެ ގޮތް ކިޔާގެން ނުވާނެ ކަމަށާއި އެކަމަށް ފާރަވެރިވާން ޖެހޭނެ ކަމަށެވެ.
މީގެ އިތުރުން އެމަނިކުފާނު ވަނީ އެމަނިކުފާނު ކުށެއް ނުކުރަން ކަމަށް ސާބިތުކަމާއިއެކު ވިދާޅުވެފައެވެ. އަދި އަނިޔާކޮށް ކުޑަގޮޅިއަށް ލާގެން އުޅެނީ ރައްޔިތުންގެ ހައްގުގައި ވަކާލާތު ކުރާނެކަން އިގޭތީ ކަމަަށް ވިދާޅުވިއެވެ.
ރައީސް ޔާމީން ވިދާޅުވީ، އެމަނިކުފާނު އެދޭ ރަންޒަމާން ގައުމަށް ހޯދައިދިނުމަށް ކުރެވުނު ދަތުރުގައި ޖެހުނީ ކުޑަކުޑަ މަޑުޖެހުމެއް ކަމަށާއި އެ ދަތުރު މާތްﷲގެ ވާގިފުޅާއިއެކު އަލުން ފަށާ އުފާވެރި ހަޔާތެއްގެ ދަންމަރު އަލުން ރޯކޮށް ނަފާވެެރިކަން މި ޖީލަށް އަލުން ގެނެސްދޭނީ މިފިކުރުން ކަމަށެެވެ.
މި މެސެޖް ނިންމާލަމުން ރައީސް ޔާމީން ވަނީ ހުރިހާ ބޭފުޅުންވެސް ހިތްވަރު ކުރައްވާ ގަދައަޅާ މަސައްކަތް ކުރަރެއްވުމަށް އެދިފައެވެ. އެމަނިކުފާނު ވިދާޅުވީ އެބުރި އަންނާނީ ބަދަހި ކޮށް ކަމަށެވެ.
މީގެ އިތުރުން ބޯމަތިވެފައިވާ ލޯކަލް ކައުންސިލް އިންތިހާބު ކާމިޔާބު ކުރެއްވުމަށް ކޯލިޝަންގެ ހުރިހާ ބޭފުޅުން ކުރައްވާ މަސައްކަތައް ޝުކުރުވެރިވާ ހާލު ކާމިޔާބު މެދުވެރިކުރެއްވުމަށް އެމަނިކުފާނު ވަނީ ދުއާ ކުރައްވާފައެވެ. އަދި ބަރަކާތެރި ރަމްޝާން މަހުގެ ތަހްނިޔާވެސް ވަނީ އަރިސްކޮށްފައެވެ.
އެމްއެމްޕީއާރްސީގެ ހިޔާނާތުގެ ފައިސާ ކަމަށް ތުހުމަތުކުރާ އެއް މިލިއަން ޑޮލަރު ރައީސް ޔާމީންގެ އިސްލާމިކް ބޭންކްގައި އޮންނަ ސޭވިން އެކައުންޓަކަށް ޖަމާކޮށް މަނީ ލޯންޑާކުރި ކަން ސާބިތުވާކަމަށް ނިންމާ ރައީސް ޔާމީން ފަސް އަހަރަށް ޖަލަށްލުމަށް ހުކުމްކުރީ 2019 ވަނަ އަހަރުގެ ނޮވެމްބަރު މަހުގެ 28 ވަނަ ދުވަހު އެވެ.
އެ މައްސަލައިގައި އެމަނިކުފާނު ޖަލު ހުކުމް ފުރިހަމަ ކުރައްވަމުން ގެންދަވާއިރު، އިތުރަށް އެ މައްސަލާގައި ތުހުމަތުކުރެވޭ އަދީބާއި، ޒިޔަތުއަށް ވަނީ ދައުލަތާއި އެއްބަސްވުން ހަދާ އަދަބު ލުއިކޮށް ހުކުމްކޮށްފައެވެ.
އަދަބު ލުއިކުރި ނަމަވެސް ވަކި މުއްދަތެއްގެ ޖަލު ހުކުމެއް މި ދެބޭފުޅުން ވެސް ފުރިހަމަކުރަން ޖެހުނު ނަމަވެސް އޭގެފަހުން މި ދެބޭފުޅުން ވަނީ ސިއްހީ ސަބަބުތަކަށް ކަމަށްބުނެ ގެއަށް ބަދަލުކޮށްފައެވެ.