މިހާތަނަށް އައިއިރު ލިބިފައިވާ ނަތީޖާތަކަށް ބަލާއިރު އެމްޑީޕީއަށް ކައުންސިލް އިންތިހާބުގައި %43 ގޮނޑި ކާމިޔާބު ކުރެވިފައިވާ ކަމަށް ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް ވިދާޅުވިއެވެ.
އެގޮތުން މިހާތަނަށް %92 ވޯޓު ގުނާފައިވާއިރު، ވޯޓުގެ %49 ވޯޓު އެމްޑީޕީޢަށް ކާޟިޔާބު ކުރެވިފައިވާކަން ރައީސް ފާހަގަ ކުރެއްވި އެވެ. އަދި މިޑްޓާމް އިލެކްޝަނެއްގައި މިހާތަނަށް އެއްވެސް ސަރުކާރަކަށް މިވަރުގެ ކާމިޔާބީއެއް ނުލިބޭކަމަށް ރައީސް ފާހަގަ ކުރެއްވި އެވެ.
ރައީސް ވަނީ މި އިންތިހާބުގައި މަސައްކަތް ކުރެއްވި އިލެކްޝަން ކޮމިޝަނުގެ ކޮމިޝަނަރުންނަށާއި މުވައްޒަފުންނަށް ޝުކުރު ދަންނަވާފައެވެ. އަދި ކޮވިޑްގެ މިހާލަތުގައި ދިމާވެފައިވާ ގޮންޖެހުން ތަކާއެކުވެސް މިނިވަން، އިންސާފުވެރި އިންތިހާބެއް ބޭއްވުމުގެ އިންތިޒާމް ރޭވުމުގައި އީސީން ކުރި ބުރަ މަސައްކަތް ފާހަގަކޮށް ސަރުކާރައި އެންމެންގެ ނަމުގައި ރައީސް ޝުކުރު އަދާ ކުރެއްވި އެވެ.