ރޯދަ މަހުގެ މާތްކަމާއި މަތިވެރިކަމުގެ މައްޗަށް އަލިއަޅުވާލާފައިވާ މިއަދުގެ ހުކުރު ހުތުބާގައި ބުނީ، ރޯދަ މަހަކީ އެތައް ގޮތަކުން ހާއްސަވެ، މާތްވެގެންވާ، ބަރަކާތްތެރި މަހެެއް ކަމަށެވެ. އަދި ރޯދަމަހު، ރޯދަ ހިފުމަކީ އިސްލާމް ދީނުގެ 4 ވަނަ ރުކުންކަން ފާހަގަކޮށް ހުތުބާގައި ބުނެފައިވަނީ، ރުކުނެއްގެ ގޮތުގައި ރޯދަ ހިފުން ކަނޑައެޅިފައި އެވަނީ، އެކަމުގެ މުހިއްމުކަމާއި މާތްކަމުގެ ސަބަބުންކަމަށެވެ. 

ރޯދަ މަހަކީ މަދު ދުވަސް ކޮޅެއް ކަމަށާއި ދާދި އަވަހަށް ނިމިގެން ހިނގައިދާނެ މަހެއް ކަމުން ކުރެވުނު ހެޔޮ ކަމަކުން މެނުވީ ފަހުން ފައިދާއެއް ނުކުރާނެ ކަމަށް ހުތުބާގައި ވަނީ ބުނެފައެވެ. އަދި މި ރޯދަ މަހާ ބައްދަލުވުމަކީ، ކުރިއަށް އޮތް ރޯދަ މަހާ ބައްދަލުވާނެކަން ޔަގީންވާ ކަމެއް ނޫން ކަމަށާއި މިއީ ބައެއް މީހުންގެ އެންމެފަހު ރޯދަ މަސް ކަމަށް ވުންވެސް އެކަށީގެންވާ ކަމަށް ހުކުރު ހުތުބާގައި ވަނީ ބުނެފައެވެ. 

ދުނިޔެއިން ފެންނަމުންދާ ހަގީގަތަކީ އަދި ކަން ހިގާގޮތަކީ މިއީ ކަމަށްވީނަމަވެސް ބައެއް މީހުންގެ ހާލާމެދު ހިތާމަކުރަން ޖެހޭކަން ހުކުރު ހުތުބާގައި ވަނީ ފާހަގަކޮށްފައެވެ. އާހިރަތާ މެދު އާފިލުވެ، ރޯދަ މަހަކީ ކިހާ މަތިވެރި މަހެއްކަން އެބައިމީހުން ނުދަނަ ކަމަށް ހުކުރު ހުތުބާގައި ވަނީ ބުނެފައެވެ. މިއީ ހަމައެކަނި ތަފާތު ކެއުންތަކާއި ބުއިންތަކުގެ، ކުޅިވަރާއި މަޖަލުގެ އަދި ރޭގަނޑު ހޭލާ ހުރެފައި، ދުވާލު ހަތަރުދަމު ނިދަން އޮތް މަހެއް ކަމަށް ބައެއް މީހުންނަށް ހީވާކަން ފާހަަގަކޮށް ހުކުރު ހުތުބާގައި ބުނީ އެބައިމީހުންނަށް ވަނީ ރޯދައިގެ މަގްސަދު އޮޅިފަ ކަމަށެވެ ނަތީޖާއެއްގެ ގޮތުން ރޯދަމަހު ޒުވާބު ކުރުމާއި އަރާރުން ވުން ގިނަވެ، ކާބޯތަކެތި އިސްރާފު ކުރުމާއި ވަގުތު ބޭކާރު ކުރުން އިތުރުވާ ކަމަށެވެ. އަދި އެއީ އުޅެންވީ ގޮތެއް ނޫން ކަމަށް ބުނެފައިވެއެވެ.

މީގެ އިތުރުން ހުތުބުގައި ވަނީ އެކަން ކަމަށް ވިސްނައި ފިކުރު ކުރުމަށް ގޮވާލާފައެެވެ. ތިބާ ކުރިއަށް އޮތް ދަތުރަށް ތައްޔާރު ކޮއްފައި ވަނީ ކޮންކަހަލަ އަމަލުތަކެއްތޯ ސުވާލުކުރަން ޖެހޭ ކަމަށްވެސް ބުނެފައިވެއެވެ. 

ކުރިއަށް އޮތީ ފަސޭހަ މަރުޙަލާތަކެއް ނޫން ކަމަށާއި ކުރިއަށް އޮތީ މަރުހިއްޕަވާ ވަގުތުކަމަށާއި ކައްވަޅުގެ އެކަނިވެރިކަން އަދި މަޙްޝަރުގެ މައިދާނާއި، ސިރާތު މަގު ހުރަސް ކުރުމާއި،  ހިސާބު ބެއްލެވޭވަގުތުކަން ފާހަގަކުރަމުން މި ރޯދަ މަހު ފާފަވުއްސެވުމަށާއި ދިންނެވުމަށް އެދި ގިނަ ގިނައިން ދުއާ ކޮށް މި މަހުގެ ހެޔޮކަން ލިބިގަނެ ހެޔޮ ގޮތުގައި މިމަސް ހޭދަކުރުމަށް ހުކުރު ހުތުބާގައި ވަނީ ގޮވާލާފައެވެ