ބަދުރުހަނގުރާމައިން ލިބިދޭ ފިލާވަޅުތަކުގެ މައްޗަށް އަލިއަޅުއްވާލައްވާފައިވާ މިއަދުގެ ހުކުރު ހުތުބާގައި ބުނީ، ބަދުރުހަނގުރާމައިން ދަސްކޮށްދެނީ ނަސްރަކީ ﷲ ދެއްވާ އެއްޗެއްކަމާއި މުއުމިނުންގެ އެންމެ ބާރުގަދަ ހަތިޔާރަކީ ދުއާދެންނެވުން ކަމަށެވެ. އެއީ ފަހަރެއްގައިވެސް ހަމައެކަނި މާއްދީގޮތުން ލަޝްކަރުގެ ބައިބޯކަމާއި، ހަތިޔާރުގެ މޮޅުކަމަށް ބިނާވެފައި އޮންނަ ކަމެއް ނޫންކަމަށް ހުތުބާގައި ބުނެފައިވެެއެވެ.
ބަދުރު ހަނގުރާމައަކީ އިބުރަތުން ފުރިގެންވާ މަތިވެރި ހާދިސާއެކެވެ. ބަދުރު ހަނގުރާމަ ހިނގާފައިވަނީ، ހިޖުރައިން ދެވަނައަހަރު، ރަމަޟާން މަހުގެ 17 ވަނަ ދުވަހުއެވެ. އެދުވަހު، ޤުރައިޝް ވަންހައިގެ ބޮޑުން، ނިކުތީ ބޮޑާކަމާއި، ކިބުރުވެރިކަމާއެކުއެވެ. ބަދުރު ހަނގުރާމައިގައި، މުސްލިމުންގެ ޢަދަދަކީ 313 ވަރަކަށް ބޭކަލުންނެވެ. އޭގެތެރޭގައި ހިމެނެނީ ހަމައެކަނި ދެ އަސްވާރުންނެވެ.
ކީރިތި ރަސޫލާ ނިކުމެވަޑައިގަތީ ހަނގުރާމައެއް ކުރައްވާކަށެއް ނޫނެވެ. ދުޝްމަނުންގެ ލަޝްކަރުގެ ޢަދަދު ހާހަކަށް ވުރެ އަސްވާރުން ތިއްބެވެ. އެމީހުން ނިކުތީ ހަނގުރާމައަށް ތައްޔާރުވެގެންނެވެ. ނަމަވެސް ﷲ އިރާދަކުރެއްވީ، އެކަލާނގެ ނަސްރުގެ ވައުދުފުޅު ފުރިހަމަކުރެއްވުމަށެވެ. ބަދުރުހަނގުރާމައިގައި މަލާއިކަތުންގެ ފައުޖުތައް ވަނީ ބައިވެރިވެ ވަޑައިގެންފައެވެ. އެގޮތުން ފަސްހާސް މަލާއިކަތުންގެ ވާހަކަވެސް ގުރުއާނުގައި ވަނީ ބަޔާންކުރައްވާފައެވެ.
ބަދުރުހަނގުރާމައިން ލިބިދޭ ފިލާވަޅުތަކުގެ މައްޗަށް އަލިއަޅުއްވާލެއްވި މިއަދުގެ ހުކުރު ހުތުބާ ނިންމަވާލައްވަމުން ބުނެފައިވަނީ ބަދުރުގެ މަތިވެރި ނަސްރުން އިބުރަތް ހާސިލުކުރައްވުމަށް އެދޭކަމަށެވެ. އަދި އިސްލާމް ދީނުގެ ދިފާޢުގައި ކުރަން ޖެހިއްޖެ ކޮންމެ ކަމެއްގައި ކެރިގެން ކުރިމަތިލުމަށާއި ﷲ ގެ ރަސޫލާގެ ހައްގުގައި ދޭންޖެހިއްޖެ ޤުރުބާނީއަކަށް ފަސްޖެހި ނުލައްވެއްމަށް ގޮވާލައްވާފައިވެއެވެ.
މީގެ އިތުރުން ކެތްތެރިކަމާއި، ތަގުވާވެރިކަމާއި، އެކުވެރިކަމާއެކު ހެޔޮގޮތުގައި ދެމިތިބުމަށް ހުކުރު ހުތުބާގައި ވަނީ ނަސޭހަތްތެރިވެފައެވެ.
