365 ޑޭސްއަކީ މާފިއާގެ އިސް މީހެއް ކަމަށްވާ އެ ފިލްމުގެ މެއިން ކެރެކްޓާ، މާސީމޯ، އަންހެން ކުއްޖަކު ކިޑްނެޕްކޮށް 365 ދުވަހުގެ ތެރޭގައި އެ އަންހެން ކުއްޖާގެ ލޯބި ހޯދުމަށް މަސައްކަތް ކުރާ ގޮތުގެ ވާހަކައަކަށް ބިނާކޮށް އުފައްދާފައިވާ ފިލްމެކެވެ.
ނެޓްފްލިކްސް އިން ބުނީ 365 ޑޭސްގެ ދެ ސީކުއެލް ނުވަތަ އިތުރު ދެބައި އަދި ނެރުމަށް ހަމަޖެހިފައިވާ ކަމަށެވެ. ފުރަތަމަ މިދިޔަ އަހަރުގެ ޖޫން މަހު 365 ޑޭސް ނެޓްފްލިކްސް އަށް އެޑް ކުރުމާއެކު ގިނަ ބައެއްގެ ތަރުހީބު ލިބިފައިވާކަމަށް ނެޓްފްލިކްސް އިން ބުންޏެވެ.
އެގޮތުން އަލަށް ނެރޭ ދެ ސީކުއެލްގައި ވެސް މެއިން ސްޓާރުންގެ ގޮތުގައި ފެނިގެންދާނީ ފުރަތަމަ ފިލްމުގައިވެސް އުޅުނު ފަރާތްތަކެވެ. ނަމަވެސް ކޮންމެވެސް ވަރަކަށް އާ މޫނުތައް ފެނިގެންދާނެ ކަމަށް ނެޓްފްލިކްސް އިން ބުނެއެވެ.
365 ޑޭސް އަށް މިދިޔަ އަހަރުގެ ތެރޭގައި ލިބުނު ކާމިޔާބީއާއި ތަރުހީބު ފާހަގަކޮށް ނެޓްފްލިކްސް އިން ބުނީ ޖުމްލަ 90 ގައުމެއްގެ ނެޓްފްލިކްސް ޓޮޕް 10 ފިލްމް ތަކުގެ ތެރޭގައި 365 ޑޭސް ހިމެނުނު ކަމަށެވެ. އަދި މިދިޔަ އަހަރު ގްލޯބަލީ އެންމެ ގިނައިން މީހުން ގޫގުލްކުރި ފިލްމުތަކުގެ ހަތަރުވަނައިގައި ވެސް 365 ޑޭސް ހިމެނެއެވެ.
މި ފިލްމަށް ގިނަ ބައެއްގެ ތަރުހީބު ލިބުނު ނަމަވެސް ފިލުމުގައި ބަދުއަހުލާގީ މަންޒަރުތައް ދައްކާކަމަށް ބުނެ ގިނަ ބަޔަކު ވަނީ ފާޑުކިޔާފައެވެ.
