“އާޒިމް އުފުލިކަމަށް ބުނާ ދިޔާ އެއްޗަކީ އެއީ ކޮން އެއްޗެއްތޯ؟”ސީއެންއެމްގެ “އިތުރުކާފު”ޕްރޮގްރާމުގައި ސުވާލުކުރުމުން ވިދާޅުވީ، ކުރިން ދެއްވި އިންޓަވިއުއެއްގައި އެއީ ކަރުދާސް ނޫންކަމަށް ޔަގީން ކޮށްދިނިން ކަމަށާއި މިއަދު އެއީ ހަރާން އެއްޗެއް ނޫންކަން ޔަގީންކޮށްދެން ކަމަށެެވެ.
އެހެންނަމަވެސް އެއީ ހަރާން އެއްޗަކަށް ނުވިޔަސް ގެންދެވީ ކޯކު ފުޅިއެއްތޯ؟ ނުވަތަ އެނާޖީ ޑްރިންކެއްތޯ؟ ސީދާ ސާފުކޮށް ދިނުމަށް ސީއެންއެމްގެ އިތުރުކާފު ޕްރޮގްރާމްގައި ނޫސްވެރިޔާ ވަނީ ތަކުރާރުކޮށް ސުވާލުކުރައްވާފައެވެ. އެހެންނަަމަވެސް އާޒިމް ވިދާޅުވީ، އެވާހަކަ އަދި މިވަގުތައް ދައްކަން ބޭނުންނުވާ ކަމަށާއި، ދެމަސްވަރު ފަހުން އެއީ ކޯޗެއްކަން ހާމަކުރައްވާނެ ކަމަށެވެ.
އާޒިމް ވިދާޅުވީ އެއީ ކޯޗެއްކަން އާޒިމްއަށް އެނގޭކަމަށާއި، ހަމަގައިމުވެސް އެއީ ހަރާން އެއްޗެއް ނޫންކަމަށެެވެ. އެމްއެމްޕީއާރުސީ ހިޔާނާތުގެ ލިސްޓުގައި އާޒިމްގެ ނަން ހިމެނުމާއިއެކު ކުރެވޭ ތުހުމަތުތަކާ ގުޅޭގޮތުން އޮންލައިން ނޫހަކަށް ދެއްވި އިންޓަވިއުއެއްގައި އާޒިމް މީގެ ކުރިން ވިދާޅުވެފައިވަނީ އަދީބާއި ބައްދަލުކޮށް ދަބަހަކަށް އަޅައިގެން ގެންދިޔައީ ކަރުދާހެއް، ނޫނީ ފައިސާއެއް ނޫން ކަމަށާއި، އެއީ ދިޔާއެއްޗެއް ކަމަށެވެ.
