މިފަހުން ކަޅުވަކަރު މިސްކިތް ބަލައިލަން އައި ފަތުރުވެރިއަކަށް އެތަން ދިވެއްސަކު ސިފަކޮށްދިން ގޮތަށް ގިނަ ބައެއްގެ ސަމާލުކަން ވަނީ ހުއްޓިފައެވެ. ފަތުރުވެރިޔަކާއެކު ހަރަކާތްތެރިވި ދިވެހި ޓުއާ ގައިޑަކު އެތަން އޭނާއަށް ތައާރަފްކޮށްދޭ މަންޒަރު ދައްކުވައިދޭ ވީޑިއޯއެއް މިހާރު މީސްމީޑިއާގައި އަންނަނީ ދައުރުވަމުންނެވެ.
މީސްމީޑިއާގައި ދައުރުވަމުން އަންނަ ވީޑިއޯގައި ކަޅުވަކަރު މިސްކިތުގެ ފުރަތަމަ ތައާރަފެއްގެ ގޮތުގައި ޓުއާ ގައިޑު ބުނީ އެއީ ރާއްޖޭގައި މިވަގުތު ހުރި އެންމެ ދުވަސްވީ މިސްކިތް ކަމަށާއި މިހާރު އެ މިސްކިތަށް ހާހަކަށް ވުރެ ގިނަ އަހަރު ވެފައިވާ ކަމަށެވެ. އަދި ކަޅުވަކަރު މިސްކިތް ދެކެ ހުރިހާ ދިވެހިން ވެސް ވަރަށް ލޯބިވާ ކަމަށް އޭނާ ވަނީ ބުނެފައެވެ.
އިނގިރޭސިބަހުން އެތަން އިތުރަށް ސިފަކޮށްދެމުން އޭނާ އިތުރަށް ބުނީ އެ މިސްކިތް ހުންނަ ތަން އަބަދުވެސް ރާއްޖޭގެ ރައީސުން ބަދަލުވުމާއެކު، ބަދަލުވަމުން އަންނަ ކަމަށެވެ. މީގެ ކުރިން ވެސް އެތައް ތަނެއްގައި މިސްކިތް ހުރިކަން ފާހަގަކުރަމުން އޭނާ ބުނީ އެ ފަތުރުވެރިޔާ ދެން މިތަނަށް އަންނައިރު އެތަނުގައި މިސްކިތް ނުހުރުމަކީ ވެސް އެކަށީގެންވާ ކަމެއް ކަމަށެވެ.
ޓުއާގައިޑު ކަޅުވަކަރު މިސްކިތް ސިފަކޮށްދިން ގޮތުން އޭނާ އަޖައިބުވެފައިހުރި މިންވަރު އެ ވީޑިއޯއިން ފެނިގެންދެއެވެ.
ކަޅުވަކަރު މިސްކިތުގެ ތާރީހަށް ބަލާއިރު އެތަނަކީ ދިވެހިތާރީހުގައި އެންމެ ގިނަ ތަންތަނަށް ދުވި މިސްކިތެވެ.
ތާރީހް އިސްލާމް ދީބާ މަހަލްގައި ވަނީ 1773 ގައި ޣިޔާޘުއްދީނުގެ ވެރިކަން ވައްޓާލުމަށް ފަހު ފާށަނާކިލެގެފާނު ރަދުން ވަނީ ރަސްކަން މިލްކުކޮށް ދީފިނަމަ އައްސުލްޠާނު މުޙައްމަދު ޣިޔާޘުއްދީން އިސްކަންދަރުގެ ގަނޑުވަރު ތަޅާލައި އެތާނގައި މިސްކިތެއް ބިނާ ކުރުމަށް ނަދުރު ބުނެފައެވެ.
އެ ނަދުރުގެ މައްޗަށް ތަޅައިލެވުނު ގަނޑުވަރު ހުރި ތާނގައި މިސްކިތެއް ބިނާ ކުރައްވައި އެ މިސްކިތަށް ކަޅުވަކަރު މިސްކިތޭ ކިޔައި ނަން ދިންއިރު އެކަން ހިނގީ އައްސުލްޠާނުލް ޣާޒީ ޙަސަން ޢިއްޒުއްދީނުގެ ދަރިކަލުން އައްސުލްޠާނު ޙަސަން ނޫރައްދީނުގެ ރަސްކަމުގަ އެވެ.
މާލޭގެ މިސްކިތްތައް ފޮތުގައިވާ ގޮތުން އެކި ޒަމާނުގައި އެކިތަންތާގައި މި މިސްކިތް ހުރިކަމުގައި ތުންތުން މަތިން ދެކެވޭ ވާހަކައެއްގައި، އެއް ދުވަސް ވަރެއްގައި މި މިސްކިތް މިހާރުގެ ޗާނދަނީމަގުގެ ކޮންމެވެސް ހިސާބެއްގައި އެ މަގުގެ އިރުމަތީފަޅީގައި ހުރިކަމަށާއި މިހާރުގެ މަޖީދީމަގުގެ ދެކުނު ފަޅީގެ މައްޗަންގޮޅީގެ ކޮންމެވެސް ހިސާބެއްގައި ހުރިކަމުގައި ވާހަކަ ދެކެވޭ ކަމަށެވެ.
އޭގެ ފަހުން، އެއްވަނަ ޙަސަން ނޫރައްދީން، މި މިސްކިތް ނަންގަވައިގެން ގެންގޮސް މަޖީދީމަގާއި ހެންވޭރު ކަރަންކާމަގާ އިންވީ ހުޅަނގު އުތުރު ކަންމަތީ ބަހައްޓަވައި، މިސްކިތް ޢިމާރާތްކުރައްވާ ނިންމެވީ ކަމަށް ވެ އެވެ.
ދެން އެއަށްފަހު، އެކެއް އޮކްޓޯބަރު 1978 ގައި ނީލަންކިޔައިގެން މިސްކިތް ނެންގެވީ ފުރަނަ ޓުއަރިސްޓް ރިސޯޓުން 9,715.26 ރުފިޔާ އަށް ކަމަށް ވެސް ވެ އެވެ. ނީލަންކިއުމާ ގުޅިގެން މިސްކިތް ރޫޅައިގެން މާލެއަތޮޅު ފުރަނަފުއްޓަށް ގެންދެވިފައި ހުއްޓައި، 1979 ގައި އަނބުރާ މާލެ ގެނެވުނެވެ. އޭގެ ފަހުން، މައުމޫނު ޢަބްދުލްގައްޔޫމުގެ ވެރިކަމުގައި، 1980 ގައި، ސަލްޓަންޕާކުގެ އިރު ދެކުނު ކަނުގައި އެ މިސްކިތް ބެހެއްޓުނެވެ.
އެއަށް ފަހު، 2016 ގައި، އަބްދުﷲ ޔާމީނުގެ ވެރިކަމުގައި، އެ ތަނުން މިސްކިތް ނަގައި، ރާއްޖޭގެ އެހެން ސަރަހައްދަކަށް ބަދަލުކުރުމަށް ނިންމާފައިވަނިކޮށް، ވެރިކަން ބަދަލުވެ، 2018 ގައި އިބްރާހީމް މުހައްމަދު ސޯލިހުގެ ވެރިކަމުގައި އެ މިސްކިތް، ކުރީގައި ޓަކިބޭ މިސްކިތް ހުރިތަނުގައި މިހާރު ވަނީ ގާއިމްކޮށްފައެވެ.
