ޑރ. ޖަމީލް ސީއެންއެމް އަށް ވިދާޅުވީ ނަފުރަތުގެ ބިލުގައި ވަރަށް ގިނަ ގުނަ ބޮޑެތި ކަންބޮޑުވުންތަކެއް އެބަހުރި ކަމަށާއި އިސްލާމްދީނުގެ ދިފާއުގައި ބިލާ ދެކޮޅަށް ނުކުންނަންޖެހޭ ކަމަށެވެ. އެގޮތުން އެ ބިލުގެ ސަބަބުން ދިމާވާ މައިގަނޑު ދެ ކަންބޮޑުވުމެއް ޑރ.ޖަމީލް ވަނީ ހިއްސާކުރައްވާފައެވެ.
އެގޮތުން މިހާރު އޮންނަ ގަވާއިދުގައި ބުނާ ގޮތުން ދިވެހި ރައްޔިތުކަން ދޫކޮށްލުމަށްފަހު، އަލުން ރާއްޖޭގެ ރައްޔިތަކަށް ވުމަށް ގާތްގަނޑަކަށް ހަ މަސްދުވަސް ލިބޭކަން ފާހަގަކުރައްވައި ޑރ. ޖަމީލް ވިދާޅުވީ އެހެންކަމުން ނަފްރަތުގެ ބިލުގެ ސަބަބުން އެ ދުވަސްވަރު ދީނާ ދެކޮޅު ވާހަކަ ދެއްކުމަށް އެމީހުންނަށް "ލައިސެންސެއް" ލިބިގެންދާ ކަމަށެވެ. އިސްލާމްދީނާއި ދިވެހި ރައްޔިތުކަން ދޫކޮށްލުމަށްފަހު އެ ލިބޭ ހަ މަސްދުވަހުގެ ތެރޭގައި ދީނާ ދެކޮޅު ވާހަކަ ދެއްކުމަށްފަހު އަނެއްކާވެސް އަލުން ދިވެހި ރައްޔިތަކަށް ވުމުގެ ފުރުސަތު ގާނޫނުން ލިބިދީފައި ވުމަކީ ވަރަށް ނުރައްކާތެރި ކަމެއް ކަމަށް ޖަމީލް ވިދާޅުވިއެވެ.
ހާއްސަކޮށް މިހާރު ފަރުމާކޮށްފައިވާ ނަފްރަތުގެ ގާނޫނުގެ ދަށުން ރައްޔިތުކަން ދޫކޮށްލާފައިވާ ފަރާތަކު ދީނާ ހިލާފު ކަމެއް ކުރިޔަސް އެމީހުންގެ އަމަލުތައް މަނާކުރުން ވެެގެންދާނީ ނަފުރަތުގެ އަމަލަކަށް ކަން ޑރ. ޖަމީލް ފާހަގަކުރެއްވިއެވެ.
ޑރ. ޖަމީލް އިތުރަށް ވިދާޅުވީ މިހާރު ވަކި ވަރެއްގެ ފައިސާ ދީގެން ބޭރުގެ ފަރާތްތަކަށް ރާއްޖޭގައި ވަޒަންވެރި ވެވޭގޮތައް ގަވާއިދު ހަދަން ނިންމާފައި ވާއިރު، އެފަދަ ބަޔަކު އިސްލާމްދީނާ ހިލާފު ކަމެއް ކުރިޔަސް ނަފުރަތުގެ ބިލުން އެމީހުން ހިމާޔަތްވާނެ ކަމަށެވެ.
އެހެންކަމުން މާ ކުރިންބައިން އެ ދެ ގާނޫނު ހަދައި، އެ ފަރާތްތަކަށް ހިމާޔަތް ލިބޭގޮތައް ނަފްރަތުގެ ގަނޫނު ހެދުމަށް މިހާރު ސަރުކާރުން މަސައްކަތް ކުރަމުން ގެންދަނީ ވަރަށް ބޮޑަށް ރާވައިގެން ކަމަށް ޑރ.ޖަމީލް ވަނީ ސިފަކުރައްވާފައެވެ.
ސަރުކާރުގެ ފަރާތުން މިހާރު މަޖިލީހަށް ހުށަހަޅާފައިވަ ނަފްރަތުގެ ބިލުގައި ވާގޮތުން އިސްލާމީ އަގީދާއާ ގުޅުވައި މުޖްތަމައުގައި މީހަކާ މެދު ނަފްރަތު އުފެއްދުމާއި އާންމު ތަނެއްގައި މުސްލިމަކު ކާފަރެއްގެ ގޮތުގައި ސިފަކުރުން ނުވަތަ ސިފަކުރުމުގައި ބައިވެރިވުމަކީ ކުށެކެވެ.
