އެމްޑީޕީގެ 16 ވަނަ އަހަރީ ދުވަހުގެ ތަހުނިޔާ ފޮނުވައި ގަސަމް ކުރެއްވި ޓުވީޓެއްގައި ވިދާޅުވީ ޕާޓީ ތެރޭގައިވާ ބައިބައިވުން ފިލުވައި ޕާޓީގެ ސަފުތައް ރުކުރުވާލާ ދެއްވުމަށް އެދި އާދޭހާއެކު ރައީސް މުހައްމަދު ނަޝީދު އަދި ރައީސް ސޯލިހަށް ދަންނަވާ ކަމަށެވެ.
މިކަމާ ގުޅިގެން ގަސަމް ސީއެންއެމް އަށް ވިދާޅުވީ، އެފަދައިން ދަންނަވަން ޖެހުނީ ބައެއް ކަހަލަ ކަންތައްތަކުގައި ދެ ބޭފުޅުންނަށް އެއް ގަލަކަށް ނޭރި ދެބަސްވެ، އެކަހަލަ ކަންތަކެއް ފާހަގަވެފައިވާތީ އާއި ހާއްސަކޮށް ރައްޔިތުންގެ މަޖިލީހުގެ ބައެއް މެންބަރުންގެ ފަރާތުންވެސް އެކަހަލަ އަޑުތަކެއް އިވިފައި އޮތުމުން ކަމަށެވެ.
މިހާރު ޕަޓީގެ ކަންތައް ދާގޮތުން އެމްޑީޕީ ދެބައިވެދާނެކަމަށް ގަބޫލުފުޅު ކުރެވޭތީ މިއަދަކީ އެކަން އެގޮތަށް ވިޔަ ނުދިނުމަށް އެދެން އެންމެ މުނާސަބު ދުވަސް ކަމަށް ގަސަމް ވިދާޅުވިއެވެ.
ގަސަމް ވިދާޅުވީ ބަޔަކު ކޮންމެ ވާހަކައެއް ދެއްކި ކަމުގައިވީ ނަމަވެސް ޕާޓީއަށް 16 އަހަރު ފުރިގެން ދިޔަ އިރު އެމްޑީޕީ އުފެދިގެން އައި މަގްސަދު ހާސިލުވަމުންދާ ކަމަށާއި، އެމްޑީޕީ ރައްޔިތުންނަށް ހަމަހަމަ ފުރުސަތުތަކެއް ހޯދައިދީ އަދުލު ގާއިމުކޮށްދެމުންދާ ކަމަށެވެ.
އެހެންކަމުން އެމްޑީޕީ ވެރިކަމުގައި ތަފާތު ދައްކާނެ ކަމަށާއި، ރައްޔިތުންނަށް މިނިވަންކަމާއި އިންސާފުވެރިކަމާއި ހަމަހަމަކަން ލިއްބައިދޭކަމުގެ ފުރިހަމަ ޔަގީންކަން އެބަ އޮތް ކަމަށް ގަސަމް ވިދާޅުވިއެވެ.
