މިއަދު މޯލްޑިވްސް ނެޝަނަލް ޕާޓީގެ(އެމްއެންޕީ) ފަރާތުން ބޭއްވި ނޫސްވެރިންގެ ބައްދަލުވުމުގައި ނާޒިމް ވިދާޅުވީ އެޕާޓީގައި އޮތީ ވަކި ފިލޯސަފީއެއްކަމަށެވެ.
ނޫސްވެރިއަކު ކުރި ސުވާލަކަށް ޖަވާބު ދެއްވަމުން ނާޒިމް ވިދާޅުވީ މިހާރު ރާއްޖޭގައި އޮތް ދެފިކުރަކީ މީހުންގެ ވަށައިގެން އެނބުރޭ ފިކުރުތަކެއްކަމަށެވެ. އަދި އެއީ ވަކިބަޔަކު ކޯޓު ލައްވައިދޭން މަސައްކަތްކުރާ ބައެއް ކަމަށާއި އެކަން އެގޮތަށް އެމްއެންޕީގައި ނޯންނާނެކަމަށެވެ.
އަދި އެޕާޓީއަކީ ވަކި މީހެއްގެ ޕާޓީއަކަށް ނުވާނެ ކަމަށާއި އެޕާޓި އާ މީހުންގުޅެންޖެހޭ ސަބަބަކީވެސް އެއީ ކަމަށް ނާޒިމް ވިދާޅުވިއެވެ.
ނާޒިމް ވިދާޅުވީ މިހާރު ރާއްޖޭގައި އޮތް ދެފިކުރަށް ތާއީދު ކުރަނީ ގާތްގަނޑަކަށް ރާއްޖޭގެ އާބާދީގެ ފަންސާހަކަށް އިންސައްތަ ކަމަށެވެ. އެހެންވެ، ބާކީ ތިބި ގިނަ މީހުންނަކީ އެޕާޓީގެ ފިކުރުގައި ތިބި މީހުންކަމަށެވެ. އަދި ހުއްޓުމެއްނެތި ޕާޓީއަށް މީހުން އިތުރު ކުރުމުގެ މަސައްކަތް ކުރައްވާނެ ކަމަށާއި، ރާއްޖޭގެ ހުރިހާ ރަށެއްގައި އެޕާޓީގެ އޮފީސްތައް ވަރަށް އަވަހަށް ހުޅުވާނެކަމަށްވެސް ނާޒިމް ވިދާޅުވިއެވެ.