އިކޮނޮމިކް މިނިސްޓްރީން މިއަދު ގެޒެޓްކުރި އިއުލާނެއްގައި ބުނީ ކޮވިޑް-19 އިން ރައްކާތެރިވުމަށް އަޅާފައިވާ ހާއްސަ ފިޔަވަޅުތަކަށް ބަދަލު ގެނައުމާގުޅިގެން، ކާބޯތަކެތީގެ ހިދުމަތްދޭ ތަންތަން އާންމުންނަށް ހުޅުވާލައިގެން ހިދުމަތް ދެވޭ ވަގުތަކީ، ފަތިހު 4:00 އިން މެންދަމު 1:00 އާ ދެމެދު ކަމަށް ކަނޑައަޅާފައިވާ ކަމަށެވެ.
ރާއްޖޭގެ ކޮވިޑްގެ ހާލަތު ރަނގަޅުވަމުން އަންނާތީ އެޗްޕީއޭއިން އަޅާފައިވާ ގިނަ ފިޔަވަޅުތަކަށް ވަނީ ލުއިދީފައެވެ.
ހެލްތު އިމަޖެންސީ އޮޕަރޭޝަންސް ސެންޓަރު (އެޗްއީއޯސީ) އިން މިމަހުގެ 6 ވަނަ ދުވަހުން ފެށިގެން ކެފޭތަކުގެ ހިދުމަތް ދިނުމަށް ވަނީ ހުއްދަދީފައެވެ.
ސައިހޮޓާ، ކެންޓީން، ކެފޭ، ރެސްޓޯރަންޓު ފަދަ ކާބޯތަކެތީގެ ހިދުމަތްދޭ ތަންތަން ހުޅުވާފައި އޭގެ ކުރިން ބެހެއްޓޭ ގަޑިއަކީ ހަވީރު 5:30 އިން ރޭގަނޑު 9:00 އަކަށެވެ. ނަމަވެސް 6 ވަނަދުވަހުން ފެށިގެން ދިން ހުއްދައާއިއެކު އާއްމު ހާލަތުގައި އެތަންތަނުން ހިދުމަތްދޭ ގަޑިތަކުގެ ހުއްދަ ދެވުނެވެ. އެކަމަކު އެއީ ދަންވަރު 12 ޖެހުމާ ހަމައަށެވެ.
ކޮވިޑްގެ ހާލަތަށް ރިއާޔަތްކޮށް ރެސްޓޯރެންޓް ކެފޭގެ ހިދުމަތްދޭ ތަަންތަން ހުޅުވާފައި ހުންނަ ގަޑިތަކަށް އެކި ދުވަސްތަކުގެ މަތިން ބަދަލު ގެންނަމުން އައިސް އާއްމު އުސޫލަކުން އެތަންތަނުން ހިދުމަތްދިނުމުގެ ހުއްދަ މިހާރު ވަނީ ދީފައެވެ.
