އެ ލަވަ އަކީ ކުޅަދާނަ ކެމެރާމަން އަލީ ރަޝީދު (ގޮޅާ އައްޔަ) ޑައިރެކްޓު ކޮށް ހުޅުމާލޭގައި ޝޫޓްކޮށްފައިވާ ލަވަ އެކެވެ.
މިހާތަނަށް 200 އަށް ވުރެ ގިނަ ލަވައިގެ ރެކޯޑިން ހަދާފައިވާ ރިއްފަތު ސީއެންއެމް އަށް ބުނީ، "ވޭނުގާ" އެ ލަވަ އަކީ އޭނާގެ އަޑުން ކިޔާފައިވާ ލަވަ އެއް ކަމަށާއި ލަވަ އަންނަ ހުކުރު ދުވަހުގެ ރޭ ރާއްޖެޓީވީން ގެނެސްދޭ ކުލަ ސްކްރީން ޕްރޮގްރާމްގައި ރިލީޒްކުރަން ނިންމާފައިވާ ކަމަށެވެ.
އަހުމަދު އިސްމާއިލް (އަންމަޑޭ) ގެ ލިރިކްސް އަކަށް ކިޔާފައިވާ އެ ލަވައިން ފެނިގެންދާނީ ފިލްމީ ތަރި އަހުމަދު އީސަ (އާނަންދު) އާއި އައިޝަތު ތުހުފާ ( ތޫ ) އެވެ. ތޫ އަކީ ދިވެހި ޑްރާމާ ސީރީޒްތަކުން މި ފަހުން ފެންނަން ފެށި މޫނެކެވެ.
"ވޭނުގާ" އަކީ މުހައްމަދު އަހުމަދު (ކޮއްކޮ) މިއުޒިކް ހަދާ ރެކޯޑިން ހަދާފައިވާ ލަވަ އެކެވެ.
ރިއްފަތު ބުނީ ލަވަ ރިލީޒް ކުރުމުގެ ކުރިން ލަވައިގެ އޮފިޝަލް ޕޯސްޓަރާއި ކުޑަ ޓީޒާ އެއް ސޯޝަލް މީޑިއާ އަށް ދޫކޮށްލާނެ ކަމަށެވެ.
ރިއްފަތުގެ އަޑުން ކިޔާ އެންމެ ފަހުން ނެރުނު ވީޑިއޯ ލަވަ އަކީ ފިލްމީ ތަރި ޝިފާގެ އިތުރުން ޖިމީ ކުޅެފައިވާ "ޔާރު ދިވާނާ" އެވެ.
ރިއްފަތި މިވަގުތު އަންނަނީ އޭނާގެ އަމިއްލަ ސޯލޯ ވީޑިއޯ އަލްބަމް "ދަލާސް"ގެ މަސައްކަތް ކުރަމުން ކަން ފާހަގަކޮށްލެވެއެވެ.
