ފުލުހުން ވިދާޅުވީ މަކަރާއި ހީލަތުން މީހެއްގެ އަތުން ގިނަ އަދަދެއްގެ ފައިސާ ހޯދާފައިވާ މައްސަލައެއްގެ ތަހުގީގަށް މީހަކު ހާޒިރުކުރުމަށް ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައި ނުވާތީ، ޖިނާއީ މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައިވާ ގޮތުގެމަތިން ތަހުގީގަށް ހާޒިރުވުމަށް އަންގައި އިއުލާނުކުރާ ކަމަށެވެ.
މި މައްސަލާގައި ފުލުހުން ހޯދަނީ މުޙައްމަދު އުނައިސް، A290151 ގަސްފިނޮޅު/ކ. ކާށިދޫ (31އ) ވ އެވެ. އޭނާގެ މައްޗަށް ތުހުމަތު ކުރެވެނީ ފޯނުން ގުޅާ، މަކަރާއި ހީލަތުން މީހެއްގެ އަތުން 150،000 ރުފިޔާ ހޯދިކަމަށެވެ.
ފުލުހުން މިކަމާއި ގުޅިގެން ކުރި އިއުލާނެއްގައި ބުނެފައިވަނީ މި މީހާ ތ. ގުރައިދޫ ޕޮލިސް ސްޓޭޝަން ނުވަތަ އެންމެ ކައިރި ޕޮލިސް ސްޓޭޝަނަކަށް، 2021 ސެޕްޓެމްބަރު 05 ވަނަ ދުވަހުގެ ކުރިން ހާޒިރުވުމަށެވެ.
މި މީހާއާއި ބެހޭ އެއްވެސް މައުލޫމާތެއް ލިބިފައިވާ ފަރާތެއްވާނަމަ ލަސްނުކުރައްވާ، ތ. ގުރައިދޫ ޕޮލިސް ސްޓޭޝަންގެ ނަމްބަރ 9800113 އަށް ގުޅުއްވާ މައުލޫމާތު ހިއްސާ ކުރެއްވުމަށް ފުލުހުން އެދިލައްވައެވެ.
