ރަސްދޫ ކައުންސިލްގެ ރައީސް މުހައްމަދު ނާހިދު މިއަދު ސީއެންއެމް އަށް ވިދާޅުވީ ފުރަތަމަ އަންނަން އޮތީ މިދިއަ އާދީއްތަ ދުވަހު ކަމަށެވެ. އެހެންނަމަވެސް ހަބަރެއް ނުވެ އޮވެފައި މިއަދު ފުރަން އުޅެފައި، މޫސުން ގޯސް ވުމުގެ ސަބަބުން އަންނަ އާދީއްތަ ދުވަހަށް ދަތުރު ބަދަލު ކޮށްފައި ވާކަމަށެވެ. 

ކުރިން އެރަށަށް ދާން އޮތީ އެންވަޔަރަންމެންޓް މިނިސްޓްރީއާއި ޓޫރިޒަމް މިނިސްޓްރީގެ ޓީމެކެވެ. އެހެންނަމަވެސް އަންނަ އާދީއްތަ ދުވަހުގެ ޓީމުގައި އެދެ މިނިސްޓްރީގެ އިތުރުން ލޯކަލް ގަވަންމެންޓް އޮތޯރިޓީ (އެލްޖީއޭ) ގެ ޓީމަކާއި އެދާއިރާގެ މެންބަރު ވެސް ހިމެނިވަޑައިގަންނަވައެވެ. 

އެންވަރަންމެންޓް ޕްރޮޓެކްޝަން އޭޖެންސީ (އީޕީއޭ) އިން މިވަގުތު އެމަސައްކަތް ވަނީ ވަގުތީ ގޮތުން ހުއްޓުވާފައެވެ. އެހެންނަމަވެސް އއ.އަތޮޅުގެ ރައްޔިތުން ބޭނުންވަނީ އެކަމަށް ދާއިމީ ހައްލެއް ލިބުމެވެ.

ވެލިގަނޑު އައިލޭންޑް ރިސޯޓު އޮންނަ ފަޅުތެރެއިން ބޮޑުސަރަހައްދެއް ހިއްކުމަށް ކުރަމުންގެންދާ މަސައްކަތް ހުއްޓުވައިދޭން ގޮވާލައި ރައްޔިތުންގެ މަޖިލީހަށް ވެސް މިހާރު މައްސަލަ ވަނީ ހުށަހަޅައިފަ އެވެ.

އެ މަޖިލީހުގެ ތޮއްޑޫ ދާއިރާގެ އެމްޑީޕީ މެމްބަރު ހަސަން ޝިޔާން މިމަހުގެ 23 ވަނަދުވަހު އޮތް ޖަލްސާ އަށް ހުށަހެޅުއްވި މައްސަލައިގައި ވިދާޅުވީ ރަސްދޫ، މަޑިވަރު ސަރަހައްދަކީ އެންވަޔަރްމެންޓް ޕްރޮޓެކްޝަން އެޖެންސީ (އީޕީއޭ) އިން 2018 ވަނަ އަހަރު ހިމާޔަތްކޮށްފައިވާ ސަރަހައްދެއް ކަމަށެވެ. އެކަން އެހެން އޮއްވައި "ވެލިފިނޮޅު"ގެ ނަމުގައި އެ ސަރަހައްދުގައި ރަށެއް ހިއްކުމުގެ މަސައްކަތް ކްރައުން ކޮމްޕެނީން ފަށާފައިވާ ކަމަށާއި އެކަމަށް ވެލިނަގަމުން ދަނީ ވެލި ނެގުން މަނާކޮށްފައިވާ ސަރަހައްދަކުން ކަމަށެވެ.

ޝިޔާން ހުށަހެޅުއްވި މައްސަލަައިގައި ވިދާޅުވީ ވެލިގަނޑު ރިސޯޓުން ކުރަމުން އަންނަ މަސައްކަތަށް ވެލިބެޑް ޖަހާފައި ވަނީ ވެލިގަނޑު ރިސޯޓްގެ އިހުތިސާސް ހިނގާ ސަަރަހައްދަށް ވުރެ ބޭރުގައި ކަަމަށް ތޮއްޑޫ ދާއިރާގެ ރައްޔިތުން ގަބޫލުކުރާ ކަމަށެވެ.

"ވެލިފިނޮޅު ބޮޑުކުރުމަށް ވެލި ނެގުމަށް، އަދި ހިލަ ބާޖެއް ކައިރިކުރުމަށް ވަގުތީ ވެލި ބެޑެއް ޖެހުމުގެ ސަބަބުން އޭގެ ސެޑިމެންޓޭޝަން ފެތުރި، ސަރަހައްދުގެ މުރަކަތަކުގެ ދިރުމަށް އަސަރުކޮށްފައި ވުމާއި އެ ސަރަހައްދުގެ ކަހަނބު ޕޮއިންޓާއި ހެމަހެޑް ޝާކް ޕޮއިންޓް ކިލަނބުވެ، ނުފެންނާތީ އެކަމުގެ ޝަކުވާ އަންނަނީ ލިބެމުންނެވެ،" މެންބަރު ޝިޔާން ހުށަހެޅުއްވި މައްސަލަައިގައި ވިދާޅުވި އެވެ.

ކްރައުން ކޮމްޕެނީ ޕްރައިވެޓް ލިމިޓެޑުން ވެލިފިނޮޅު ތަރައްޤީކުރުމާއި، ވެލިގަނޑު ރިސޯޓް ގިރުން ހުއްޓުވުމަށް މެޝަނަރީ ބޭނުންކޮށްގެން، އއ. ރަސްދޫ މަޑިވަރު ފަޅުތެރެއިން ގިނަ ޢަދަދަކަށް ވެލިނަގަމުންދާ މައްސަލަ އާއި ބެހޭ ގޮތުން މިމަހު 19ވަނދުވަހު  އއ.އަތޮޅު ކައުންސިލުން ވަނީ ނޫސްބަޔާނެއްވެސް ނެރެފައެވެ.

އަތޮޅު ކައުންސިލުގެ ނޫސްބަޔާނުގައިވަނީ ކްރައުން ކޮމްޕެނީ ޕްރައިވެޓް ލިމިޓެޑުން އއ. ވެލިފިނޮޅު ތަރައްޤީކުރުމާއި، ވެލިގަނޑު ރިސޯޓް ގިރުން ހުއްޓުވުމަށް މެޝީނަރީ ބޭނުންކޮށްގެން، އއ. ރަސްދޫ މަޑިވަރު ފަޅުތެރެއިން (ފަޅުގެ އުތުރުކޮޅުން) ގިނަ ޢަދަދަކަށް ވެލިނެގުމާއި، މަޑިވަރުފަޅުން ބައެއް ހިއްކަމުންދާތީ، އެކަމުގެ ޝަކުވާ ގިނަ ރައްޔިތުންގެ ފަރާތުންނާއި، އއ. ރަސްދޫ ކައުންސިލުންނާއި އަދި ދާއިރާ ހިމެނޭ ރަށްރަށުގެ ގެސްޓް ހައުސްތައް ހިންގާ ފަރާތްތަކުން ދަނީ ކުރަމުން ކަމަށެވެ.

މިކަމާ ގުޅޭ ގޮތުން ކްރައުން ކޮމްޕެނީ އަށް ގުޅާލުންމުން އަދި މިހާތަނަށް އެކުންފުނީގެ ބަހެއް ލިބޭގޮތެއް ނުވެއެވެ. 

އަދި މިމައްސަލާގައި އެންވަޔަރަންމެންޓް މިނިސްޓްރީގެ ޑެޕިއުޓީ މިނިސްޓަރު އަލީ ސޯލިހު ވިދާޅުވީ މިހާރު އީޕީއޭއިން އެމަސައްކަތްތައް ވަގުތީ ގޮތުން ހުއްޓާލަން އަންގާފައި ވާ ކަމަށާއި، މިނިސްޓަރު ވަރަށް ގާތުން އެމައްސަލަ ބައްލަވަމުން ގެންދަވާ ކަމަށެވެ.

މީގެ ކުރިން ޒަރޫރީ އެކިއެކި ބޭނުންތަކަށާއި، ވިޔަފާރި އުޞޫލުން ގިނަ ޢަދަދަކަށް (އެއްވެސް މެޝިނަރީއެއް ބޭނުންނުކޮށް) އއ. ރަސްދޫ މަޑިވަރު ފަޅުތެރިން ވެލިނެގުމުގެ ސަބަބުން، އެ ފަޅުތެރޭގައި ހުރި ސޭންޑް ބޭންކްތައް ގިރައި، ޤުދުރަތީ ގޮތުން ބޮޑެތި ގެއްލުންތަކެއް ލިބެމުންދާތީ، އެފަދަ ބޭނުންތަކަށް ވެލިނެގުމަށް އެހެން ސަރަހައްދެއް ކަނޑައަޅައި ދިނުމަށް 30 އޮކްޓޯބަރ 2019 ގައި ރަސްދޫ ކައުންސިލުން ދެންނެވުމުން، 05 ނޮވެމްބަރ 2019 ގައި އެހެންސަރަހައްދެއް ކަނޑައަޅައި، އީ.ޕީ.އޭއިން ވަނީ އއ. ރަސްދޫ ކައުންސިލަށް އަންގާފައެވެ. 

އއ. ރަސްދޫ މަޑިވަރު ފަޅުގެ ބޮޑުބަޔަކީ އީޕީއޭ އިން ހިމާޔަތްކޮށްފައިވާ ސަރައްދަކަށްވާއިރު ފަޅުގެ އެއްކޮޅުން ގިނައަދަދަކަށް ވެލިނަގަމުންދާތީ ފަޅުތެރޭގައި ހުރި ކުދި ފިނޮޅުތައް ނެތިދިއުމާ، އަދި އެ ފަޅާ ގުޅިފައިހުރި ސްނޯކަލް ކުރުމަށް ޚާއްޞަ ތަންތަނާ، އަދި ފަރާ ކައިރީގައިހުރި ޑައިވިންގ ސްޕޮޓްތައް ކިސަޑުވެލި އެޅި އެތަންތަނަށް ބޮޑެތި ގެއްލުންތަކެއް ލިބި ޤުދުރަތީ ދިރުންތައް ނެތެމުންދާތީ، ގެސްޓް ހައުސްތައް ހިންގާ ފަރާތްތަކާއި، ޢާއްމު ރައްޔިތުން ކޮންމެ ދުވަހަކު ދަނީ އެ ސަރަހައްދު ޙިމާޔަތްކުރުމަށް ގޮވާލާ އެ ސަރަހައްދަށްގޮސް އިހްތިޖާޖް ކުރަމުންނެވެ." ކައުންސިލް ނޫސްބަޔާނުގައި ވެއެވެ.
އެކަމުގެ ސަބަބުން ތިމާވެއްޓަށާއި، އެ ސަރަޙައްދުގެ ޤުދުރަތީ ދިރުންތަކަށް ނޭދެވޭ އަސަރުކުރުމާއި، ފަތުރުވެރިކަމަށް ބޮޑެތި ގެއްލުންތަކެއް ދިމާވާނެތީ، އެ ސަރަހައްދުގައި ވަގުތީގޮތުން މަސައްކަތް ހުއްޓާލާފައިވީ ނަމަވެސް އިތުރަށް އެ މަސައްކަތް ކުރިއަށް ނުގެންގޮސް ހުއްޓުވައި ދާއިމީ ހައްލެއް ހޯއްދަވައި ދެއްވުމަށް ސަރުކާރުގައި ދެންނެވުމަށް، 19 އޮގަސްޓް 2021 ވަނަ ދުވަހު 11:04 ގައި ބޭއްވި ކައުންސިލުގެ 04 ވަނަ ދައުރުގެ 06 ވަނަ ޢާއްމު ޖަލްސާގައި ބައިވެރިވެލެއްވި އަތޮޅު ކައުންސިލްގެ މެންބަރުންގެ ޢިއްތިފާގުން އިޤްރާރުވާކަމަށް އެބަޔާނުގައި ވެއެވެ.