މި އެގްރީމަންޓުގެ ދަށުން ބީއެމްއެލް ވެގެންދާނީ ކުރިއެކޭވެސް އެއްފަދައިން ޤައުމީ ސީނިއަ ފިރިހެން ޓީމާއި، ސީނިއަ އަންހެން ޓީމު އަދި ޔޫތު ޓީމުތަކުގެ އެކްސްކްލޫސިވް ސްޕޮންސަރަށެވެ. މިއަދު ޤައުމީ ފުޓްބޯޅަ ދަނޑުގައި ބޭއްވުނު ހަފްލާގައި އެ އެގްރީމަންޓުގައި ސޮއި ކުރެއްވީ ބީއެމްއެލްގެ ފަރާތުން ސީއީއޯ އަދި މެނޭޖިން ޑައިރެކްޓަރު ޓިމް ސޯޔަރ އަދި އެފްއޭއެމް ގެ ރައީސް ބައްސާމް އަދީލް ޖަލީލް އެވެ.
މި އެއްބަސްވުމާ ގުޅޭގޮތުން ޓިމް ވިދާޅުވީ " ރާއްޖޭގައި ފުޓްބޯޅައިގެ ފޯރިގަދަ މި ދަނޑިވަޅުގައި ޕާޓްނަޝިޕް އާ ކުރެވިގެންދާކަމީ ލިބޭ އުފަލެއް ކަަމަށެވެ. އަދި ބައިނަލްއަގްވާމީ މުބާރާތްތަކުގައި ޤައުމީ ޓީމުގެ ކާމިޔާބީގައި ބައިވެރިވުމުގެ އިތުރުން ރާއްޖޭގެ ޒުވާން ޖީލަށް ހުނަރު ފުޅާކުރަން އެހީތެރިވުމަކީ ބީއެމްއެލްއިން ބޮޑު އިސްކަމެއްދޭ ކަމެއް ކަމަށެވެ.
އެފްއޭއެމްގެ ރައީސް ބައްސާމް ވިދާޅުވީ ބީއެމްއެލް އާއެކު އެ އެއްބަސްވުން އާ ކުރެވިގެންދާކަމީ ލިބޭ ފަހުރެއް އަދި އުފަލެއް ކަމަށާއި، ގައުމީ ޓީމުގެ ކުޅުންތެރިންނަކީ ރާއްޖޭގެ ފަހުރު ކަމަށެވެ. އަދި ހޯދަމުންދާ ނަތީޖާއަކީ ކުޅިވަރު ދަނޑުގެ އިތުރުން ފަރުދާގެ ފުރަގަހުގައި މަސައްކަތް ކުރާ ހުރިހާ ފަރާތެއްގެ ބުރަ މަސައްކަތާއި އެހީތެރިކަމާއި އެއްބާރުލުމުގެ ނަތީޖާ ކަމަށް ބައްސާމު ވިދާޅުވިއެެވެ.
ދެހާސް ސަތާރަ ވަނަ އަހަރުން ފެށިގެން ޤައުމީ ފުޓްބޯޅަ ޓީމުތަކުގެ އޮފިޝަލް ސްޕޮންސަރަކީ ބޭންކް އޮފް މޯލްޑިވްސް އެވެ. އަދި ކުރިއަށް އޮތް ސާފް ޗެންޕިއަންޝިޕް 2021 ގެ އޮފިޝަލް ބޭންކިން ޕާޓްނަރަކީ ވެސް ބޭންކް އޮފް މޯލްޑިވްސް އެވެ.