ދިރިއުޅޭ ގޭގެ ލިފްޓް ކައިރީ ޔާމީން ރަޝީދަށް ގިނަ ހަމަލާތަކެއް ދިނުމަށްފަހު މަރާލި މައްސަލާގައި ޖުމްލަ ހަ މީހެއްގެ މައްޗަށް ތޫނު އެއްޗެއް ބޭނުންކޮށްގެން ގަސްދުގައި މީހަކު މަރާލުމުގެ ދައުވާ ކުރެ އެވެ.
ދައުވާ އުފުލާފައިވާ މީހުން:
- މ. ތާއިފް، އިސްމާއިލް ރަޝީދު
- ހ. އަންނާރުމާގޭ އިސްމާއިލް ހައިޝަމް ރަޝީދު
- މ. އިރަސްމިކުގޭ އަހުމަދު ޒިހާން އިސްމާއިލް
- ގދ. ގައްދޫ ސިންދުބާދުގޭ، މުހައްމަދު ދިފްރާން
- މ. ކުދެހިގޭ ހަސަން ޝިފާޒް
- މ. ކޮޅުފުށީ އީސްޓް، ހުސައިން ޒިޔާދު
ކްރިމިނަލް ކޯޓުގައި އިއްޔެ ބޭއްވި އަޑުއެހުމުގައި ހެއްކާބެހޭ ގޮތުން ވާހަކަ ދައްކަވަމުން އިސްމާއިލް ރަޝީދުގެ ވަކީލް މައުމޫން ވިދާޅުވީ، ދައުލަތުން ހުށަހެޅި ސިއްރު ހެކިވެރިންގެ ތެރެއިން އެކަކުގެ ހެކިބަހަށް ބަލާއިރު، އޭނާއަކީ ޔާމީން ރަޝީދު މަރާލުމުގައި ބައިވެރިވި މީހެއް ކަން އޭނާގެ އަމިއްލަ ބަހުން ވެސް އެނގޭ ކަމަށާއި، ބައެއް ސުވާލުތަކަށް ޖަވާބު ނުދީ، ކަންކަން ސިއްރު ކުރަން އޭނާ މަސައްކަތް ކުރުމުން ވެސް އެކަން އެނގޭ ކަމަށެވެ.
މީހަކު މެރުމުގެ ބައިިވެރިވި ކަމަށް ތުހުމަތު ކުރެވޭ މީހަކަށް ދައުވާ ނުކޮށް އޭނާ ހެއްކެއްގެ ގޮތުގައި ދައުލަތުން ހުށަހެޅުމުން ދޮގު ހެކިބަސް ދިނުމުގެ ފުރުސަތު އެބައޮތްކަން ފާހަގަކުރަމުން ވަކީލު މައުމޫން ވިދާޅުވީ، އެ މައްސަލާގައި ހައްޔަރުކުރި ބައެއް މީހުންނަށް ދައުވާ ނުކުރާތީ އެކަމާ ސުވާލު އުފެދޭ ކަމަށާއި، ސިއްރު އެހެން ހެކިވެރިއަކާ ދައުލަތުން ބައްދަލުކުރި ކަމަށް އޭނާ ކޯޓުގައި ބުނެފައިވާތީ އެކަމުން ވެސް ހެއްކަށް ނުފޫޒު ފޯރުވުމުގެ ފުރުސަތު އެބަ އޮތް ކަމަށެވެ.
ވަކީލު މައުމޫން ވިދާޅުވި ގޮތުގައި ސިއްރު ހެކިވެރިންގެ ހެކިބަހާއި ވީޑިއޯ ފުޓޭޖްތަކުން ފެންނަ މަންޒަރުތަކާ ދިމަލެއް ނުވެެއެވެ. އަދި ޔާމީން މަރާލި ހާދިސާ ހިނގި ވަގުތު، އޭނާ ދިރިއުޅުނު ގެ ހުންނަ މަގާ ދިމާލަށް ޓެކްސީއެއް މަޑުކުރިކަން ވީޑިއޯތަކުން ފެންނަން އޮތަސް، ސިއްރު ހެކިވެރިންގެ ހެކިބަހުގައި އެއްވެސް އުޅަނދެއް އެ ސަރަހައްދަށް މަޑުނުކުރާ ކަމަށް ބުނާކަމަށާއި އެއް ހެކިވެރިއަކު ބުނާ ބުނުމާއި އަނެއް ހެކިވެރިޔާގެ ހެކިބަސް ފުށުއަރާ ކަންވެސް ވަކީލު މައުމޫން ފާހަގަކުރެއްވިއެވެ.
ވަކީލު މައުމޫން އިތުރަށް ފާހަގަކުރެއްވި ކަންތައްތަކުގެ ތެރޭގައި:
- އެ ސަރަހައްދުގައި ހުރި ކެމެރާތަކުން ވީޑިއޯ ފުޓޭޖްތައް ފުލުހުން ނަގާފައި ވިޔަސް، އެ ވީޑިއޯތަކުގެ ޗެއިން އޮފް ކަސްޓަޑީ ދިމާނުވުން
- ވީޑިއޯތަކުގެ ތަހުލީލު ރިޕޯޓް ހެދި ފުލުސް މީހާގެ ހެކިބަހަށް ބަލާއިރު، ތަހުލީލުތައް ހަދާފައިވަނީ ވަކި ބަޔަކަށް އަމާޒުކޮށްގެން ކަން
- ކޯޓަށް ހުށަހަޅާފައިވަނީ ވެސް އަސްލު ރިޕޯޓްގެ ބަދަލުގައި މުޅިން އެހެން ރިޕޯޓެއްކަމުން އެއީ ދޮގު ހެކިބަހެއް ކަމަށް ބެލުމުގެ ފުރުސަތު އެބައޮތް ކަން
- އިސްމާއިލް ރަޝީދު ދިރިއުޅުނު ގެ ފާސްކުރުމަށް ފަހު އެ ގެއިން އަންނައުނާއި ފޯނާއި ލެޕްޓޮޕް ފުލުހުން ގެންދިޔަޔަސް، އެއިން އެއްވެސް އެއްޗަކުން އިސްމާއިލް ރަޝީދާ ދެކޮޅަށް ހެއްކެއް ދައުލަތުން ހުށަހަޅާފައިނުވުން
ވަކީލު މައުމޫން ވިދާޅުވީ އިސްމާއިލް ރަޝީދު ދިރިއުޅުނު ގެ ފާސްކުރުމަށް ފަހު އެ ގެއިން ފެނުނު ތަކެތިވެސް އޭނާއާ އަނބުރާ ހަވާލު ކޮށްފައިވާ ކަމަށާއި، އެ ތަކެތިން އެއްވެސް ހެއްކެއް ނުފެނުމަކީ އިސްމާއިލް ރަޝީދާ އެއްކޮޅަށް ބޭނުން ކުރެވޭނެ ކަމެއް ކަމަށެވެ.
ދައުވާލިބޭ ޒިޔާދުގެ ވަކީލް އަބްދުﷲ ޝާއިރުގެ ބަސް
ވަކީލް އަބްދުﷲ ޝާއިރު ވިދާޅުވީ ދައުލަތުން 60 އެތައް ހެއްކެއް ހުށަހެޅިއިރު ވެސް، ސިއްރު ހެކިވެރިޔާ ފިޔަވައި އިތުރު މީހެއްގެ ހެކިބަސް ޒިޔާދާ ދެކޮޅަށް ނުލިބޭ ކަމަށާއި، ވީޑިއޯތަކުން ވެސް ޒިޔާދާ ދެކޮޅަށް އެއްވެސް ހެއްކެއް ލިބިފައިނުވާ ކަމަށެވެ.
އެހެންކަމުން އިސްލާމީ ޝަރީއަތުގައި މަރުގެ މައްސަލައެއް ސާބިތު ކުރެވޭނެ ގޮތާއި އަދި ހެކިބަސް ބަލައިގަނެވޭ ގޮތްތަކާ ބެހޭގޮތުން ހުލާސާ ބަޔާނުގައި ވާހަކަ ދައްކާނެ ކަމަށް އޭނާ ވިދާޅުވި އެވެ.
ދިފްރާންގެ ވަކީލް އިސްމާއިލް ވިޝާމްގެ ބަސް
ވަކީލް އިސްމާއިލް ވިދާޅުވީ ސިއްރު ހެކިވެރިއަކު ބުނާ ބުނުމެއް ފިޔަވައި އިތުރު ހެއްކެއް އެ މައްސަލާގައި ނެތް ކަމަށާއި ސިއްރު ހެކިވެރިިޔާގެ ހެކިބަހަށް ބާރު ދޭ އިތުރު އެއްވެސް ހެއްކެއް ނެތުމުން، އޭނާގެ ހެކިބަސް ގަބޫލު ނުކުރެވޭނެ ކަމަށެވެ. އަދި ވީޑިއޯ ފުޓޭޖްތަކެއް ދައުލަތުން ހުށަހެޅިޔަސް، ވީޑިއޯ އެނަލިސިސް ރިޕޯޓް ހަދާފައިވަނީ ހީވާ ހީވުމެއްގެ މައްޗަށް އެކަނި ބިނާކޮށްގެން ކަމަށް ވެސް ވިޝާމް ވިދާޅުވި އެވެ.
ވީޑިއޯ ފުޓޭޖުން ވެސް ފެންނަނީ މީހަކު ހިނގާފައިވާ ދާ މަންޒަރެއް އެކަނި ކަމަށާއި އެ މައްސަލައާ ގުޅޭ އެއްވެސް ކަމެއް އެ ވީޑިއޯއިން ސާބިތު ނުކުރެވޭނެކަން ފާހަގަކުރަމުން ވަކީލު ވިދާޅުވީ އެކަމާބެހޭ ތަފްސީލުތައް ހުލާސާ ބަޔާނުގައި ހުށަހަޅާނެ ކަމަށެވެ.
ދައުވާލިބޭ ހައިޝަމާއި ޝިފާޒްގެ އިތުރުން ޒިހާންގެ ވަކީލް ސިއްހީ ސަބަބާ ހެދި އިއްޔެގެ އަޑުއެހުމަށް ހާޒިރު ނުވެވުމުން އެ ތިން މީހުުންގެ ބައި އިއްޔެ ކުރިއަށް ނުގެންދިޔަ ނަމަވެސް އަންނަ އާދިއްތަ ދުވަހު އެކަމަށް އިތުރު އަޑުއެހުމެއް ބާއްވާނެ ކަމަށް އެ މައްސަލަ ބައްލަވާ ގާޒީ އާދަމް މުހައްމަދު ވިދާޅުވިއެެވެ. އެ އަޑުއެހުމުގައި އެ ތިން މީހުންގެ ފަރާތުން ހެއްކާ ބެހޭގޮތުން ވާހަކަ ނުދައްކައިފި ނަމަ، އިތުރު ފުރުސަތެއް އެކަމަށް ނުދެއްވާނެއެވެ.
މީގެ ހަތަރު އަހަރު ކުރިން، 2017 ވަނަ އަހަރުގެ އޭޕްރީލް މަހު 23 ވަނަ ދުވަހުގެ ރޭ ދަންވަރު 2:59 ހާއިރު ޔާމީން ރަޝީދު މަރާލީ އޭނާ ގޭގެ ސިޑި ގޮޅީގައެވެ. ބަޔަކު ވަރަށް ރާވައިގެން ޔާމީނަށް ހަމަލާ ދިނީ، އޭނާ ވަޒީފާ ނިންމާލާ، އެނބުރިގެއަށް އައި ވަގުތުގައެވެ.
ޔާމީންގެ މަރުގެ މައްސަލައަށް މިހާރު ވަނީ ހަތަރު އަހަރަށްވުރެ ގިނަ ދުވަސް ވެފައެވެ. ހަތަރު އަހަރަށް ވުރެ ގިނަ ދުވަސްވީއިރު ވެސް އެމައްސަލާގައި ގޮތެއްނިންމުން ލަސްވާތީ، އޭނާގެ އާއިލާގެ ފަރާތުން ވަނީ ކަންބޮޑުވުން ފާޅުކޮށްފައެވެ.
