ރާއްޖޭގެ ކޮވިޑް-19 ހާލަތު ގޯސްވުމުގެ ސަބަބުން އިނގިރޭސި ވިލާތުގެ ރެޑް ލިސްޓަށް ރާއްޖެ ލައިފައި ވަނީ މޭ މަހުގެ ކުރީކޮޅު އެވެ.
ރާއްޖޭގެ ކޮވިޑްގެ ހާލަތު ކޮންޓްރޯލްވެ ގިނަ ދުވަސްތަކެއްވި އިރުވެސް އިނގިރޭސި ވިލާތުގެ ރެޑް ލިސްޓުން ނަގާފައި ނުވާތީ މީގެ ކުރިން ރާއްޖެއިން އިނގިރޭސި ވިލާތައް ކަނޑައަޅައިފައި ހުންނަވާ ސަފީރު ޑރ. ފަރަހަނާޒް ފައިސަލް އަދި ގިނަ އަދަދައްގެ ދިވެހިން ވަނީ ކަންބޮޑުވުންފާޅުކޮށްފައެވެ.
މި މަހުގެ 22 ވަނަ ދުވަހުން ފެށިގެން އިނގިރޭސި ވިލާތުގެ ރެޑް ލިސްޓުން ނެގި ގައުމުތަކުގެ ތެރޭގައި ރާއްޖެ، ބަންގްލަދޭޝް، މިސްރު، ކެންޔާ، އޮމާން، ޕާކިސްތާން، ސްރިލަންކާ އަދި ތުރުކީ ހިމެނެއެވެ.
އިނގިރޭސި ވިލާތުން ދަތުރުކުރެވޭ ގައުމުތަކުގެ ލިސްޓު އޮންނަނީ ތިން ކެޓެގަރީއަކަށް ބަހާލައިފައެވެ. އެއީ ގްރީން، އެމްބާ އަދި ރެޑެވެ.
ރެޑް ލިސްޓުގައި ހިމެނޭ ގައުމުތަކަށް ދަތުރުކުރުން މަނާވާއިރު، އެގައުމަށް އެތެރެވާނަމަ 10 ދުވަހުގެ ކަރަންޓީނު މުއްދަތު ފުރިހަމަ ކުރަންޖެހޭނެއެވެ.
ގްރީން ލިސްޓުގައި ހިމަނަނީ ދަތުރުކުރުން ރައްކާތެރި ގައުމުތަކެވެ. މިގައުމުތަކުން އިގިރޭސިވިލާތަށް ދާނަމަ ކަރަންޓީން ވާކަށް ނުޖެހެއެވެ.
