މައުލޫމާތު ލިބޭ ގޮތުން ސަސްޕެންޝަން އުވާލާފައިވަނީ ހަތަރު މަސް ދުވަސްވީއިރުވެސް އެ މައްސަލާގައި ދައުވާ ކޮށްފައި ނުވާތީ އެވެ.
ހަތަރު މަސް ފަހުން މިއަދު މަހުލޫފު އޮފީހަށް ނުކުމެވަޑައިގަތުމުން ޔޫތު މިނިސްޓްރީގެ މުވަައްޒަފުން ވަނީ މަހުލޫފަށް ހޫނު މަރުހަބާ އެއް ދަންނަވާފަ އެވެ. އެގޮތުން ގައުމީ ދިދަ ސީލިންގްގައި ހަރުކޮށްފައި ހުރި އިރު މުވައްޒަފުން ތިބީ ގައުމީ ޖާޒީ ގައެވެ.
މިނިސްޓަރު މަހްލޫފް އެމްއެމްޕީއާރްސީގެ ހިޔާނާތުގެ ފައިސާގައި ހިފިކަން އޭސީސީގެ ތަހުގީގަށް ސާބިތުވެ އޭނާގެ މައްޗަށް ދައުވާކޮށްދިނުމަށް ޕީޖީ އޮފީހަށް ފޮނުވުމާއިއެކު އެކަމުގައި ޕީޖީ އޮފީހުން ވަކި ގޮތެއް އަންގަންދެން މިނިސްޓަރު މަހްލޫފް ވަޒީފާގެ މައްސޫލިއްޔަތުތަކުން ދުރުކޮށްފައިވާ ކަން މިނިސްޓަރަށް އެންގީ މިދިޔަ ޖޫން މަހުގެ ނުވަ ވަނަ ދުވަހު އެވެ.
އެ މައްސަލަ ދިގުލައިގެން ގޮސް، ގޮތެއް ނިންމުން ލަސްވެގެން ދާތީ، މަހްލޫފު ވަނީ މައްސަލަ އަވަހަށް ނިންމަވައިދެއްވުމަށް އެދިވަޑައިގެންގެންފަ އެވެ. ނަމަވެސް ޕީޖީން ބުނި ގޮތުގައި މަހުލޫފަށް ދައުވާ ކުރާނީ ޕީޖީން މައްސަލަ ރަނގަަޅަށް ދިރާސާ ކުރުމަށްފަހު އެވެ.
ދައުވާކުރަން ޕީޖީ އޮފީހަށް ފޮނުވިތާ ހަތަރު މަހަށް ވުރެ ގިނަ ދުވަސް ވެފައިވާއިިރު، މިނިސްޓަރު ކަމުގެ މަގާމުގެ މަސްއޫލިއްޔަތު ތަކުން ދުރުކޮށްފައި ވާތީ ޔޫތު މިނިސްޓްރީ ހިންގަމުންދަނީ މިނިސްޓަރަކު ނެތިއެވެ. އެ މިނިސްޓްރީ އަށް ދެން ހަވާލުވެލެއްވީ ޓުއަރިޒަމް މިިނިސްޓަރު އަބްދުﷲ މައުސޫމް އެވެ.
އެކަމާއި ގުޅިގެން ސެޕްޓެމްބަރު މަހު ބޭއްވި ނޫސްވެރިންގެެ ބައްދަލުވުމުގައި ކުރިމަތި ކުރެއްވި ސުވާލުތަކަށް ޖަވާބުދެއްވަމުން މަބްރޫކް ވިދާޅުވެފައިވަނީ، މިނިސްޓަރަކު ނެތި މިނިސްޓްރީއެއް ހިންގުމަކީ ސަރުކާރުގެވެސް ކަންބޮޑުވުން އޮތް ކަމެއް ކަމަށެވެ. ނަމަވެސް މިނިސްޓަރު މަހްލޫފްއާއި މެދު ތުހުމަތުކުރެވޭ މައްސަލައެއް ޕީޖީ އޮފީހުގައި އޮތުމާއިއެކު އަވަސް ކުރަންވެގެން ނަމަވެސް ސަރުކާރުން އެމައްސަލައިގެ ތެރެއަށް ނުވަންނަވާނެ ކަަމަށެވެ. އަދި އެމައްސަލަ އަވަސް ކުރުމަށްވެސް ސަރުކާރަށް ކުރެވޭނެ މާބޮޑު ކަމެއް ނެތް ކަމަށެވެ.
އެހެންނަމަވެސް މައްސަލަ ވަކި ގޮތަކަށް އަވަހަށް ނިންމައި ދިނުމަށް ސަރުކާރުންވެސް އެދޭ ކަމަށް މަބްރޫކް އެދުވަހު ވިދާޅުވި އެވެ. އެމައްސަލަ ލަސްވަމުންދާތީ، މަހްލޫފްގެ ސަސްޕެންޝަން ރިވިއުކުރުމާއި ގުޅޭގޮތުން ސަރުކާރުން ގެންގުޅޭ ވިސްނުމާއި ބެހޭ ގޮތުން ކުރެވުނު ސުވާލަށް ވެސް މަބްރޫކް ވިދާޅުވީ، އެކަހަލަ ވިސްނުމެއް ނުގެންގުޅޭ ކަމަށެވެ.
ދައުވާކުރުން ލަސްވަނީ އެ މައްސަލައިގައި އެކަށީގެންވާ މިންވަރަށް ހެކި ނުހޯދޭތީ ކަމަށާއި، އިތުރު ހެކިތައް ހޯދުމުގެ މަސައްކަތް ފުލުހުންނާއި އެކު ކުރަމުންދާތީ ކަމަށް ޕްރޮސެކިއުޓާ ޖެނެރަލް ހުސައިން ޝަމީމް ވަނީ ވިދާޅުވެފަ އެވެ.
އެ މައްސަލައިގައި ދައުވާކުރުމާ މެދު ގޮތެއް ނިންމޭނީ ކިހާ ދުވަހަކުންތޯ ސުވާލުކުރުމުން މީގެ ކުރިން ޝަމީމް ވިދާޅުވީ، މަހުލޫފުގެ މައްސަލައިގައި އަދިވެސް ހޯދަން ބޭނުންވާ މައުލޫމާތުތަކެއް ހޯދަން ފުލުހުންނާ އެކު ވާހަކަ ދައްކަމުން އަންނަ ކަމަށެވެ. ދައުވާ ކުރެވޭނެ ތާރީހެއް ފަހުން އަންގަވާނެ ކަމަށެވެ.
ޝަމީމް ވިދާޅުވީ، މަހުލޫފުގެ މައްސަލަ ލަސްވެއްޖެ ކަމަށާއި، ނަމަވެސް ދައުވާކުރުމާ މެދު ގޮތެއް ނިންމާނީ އެކަމެއް ކުރަން އޮންނަ ހަމައަކުން ކަމަށެވެ.
އެމްއެމްޕީއާރުސީގެ ހިޔާނާތުގެ ތަހުގީގުގައި އޭސީސީން ބުނީ، ރައްޔިތުންގެ މަޖިލީހުގެ މެންބަރެއްގެ ގޮތުގައި މަހްލޫފް ހުރެ، ރައްޔިތުންގެ މަޖިލީހުގެ ތަޅުމުގައި އޭރު ބަހުސްކޮށް ވޯޓަށް އެހި ސްޕެޝަލް އިކޮނޮމިކް ޒޯން (އެސްއީޒެޑް) ބިލަށް ވޯޓުދިނުމާއި ޕީޕީއެމްގައި ދެމި ހުރުމުގެ މުގާބިލުގައި 33,000.00 (ތެއްތިރީސްހާސް) އެމެރިކާ ޑޮލަރު މަހުލޫފަށް ލިބިފައިވާކަން ތަހްގީގުން އެނގޭ ކަމަށެވެ.
