ސާފް ޗެމްޕިއަންޝިޕުގައި ރާއްޖެ ކުޅޭ މެޗުތަކުގެ ޓިކެޓްގެ ޑިމާންޑް ބޮޑުވެ ރާއްޖެ ކުޅޭ މެޗުތަކުގެ ޓިކެޓް ހޯދުމަށް ރައްޔިތުން އަންނަނީ ގިނަ ވަގުތުތަކެއް ހޭދަކުރަމުންނެވެ. ރާއްޖެއާ އިންޑިޔާ މާދަމާ ރޭ ކުޅޭ މެޗުގެ ޓިކެޓް ހޯދުމަށް ރޭ ދަންވަރުން ފެށިގެން މީހުން ކިޔު ހަދާފައިވާއިރު މެންދުރެއްހާއިރު ޓިކެޓް ހުސްވި ކަމުގެ ރިޕޯޓްތައްވެސް ލިބުނެވެ. އެއާއެކު ޓިކެޓް ވިއްކާ ސަރަހައްދުގައި ގިނަ ބަޔަކު އަންނަނީ ނުރުހުން ފާޅުކުރަމުންނެވެ.
ސޯޝަލް މީޑިއާގައި އާއްމުވެފައިވާ، ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު ޢަބްދުﷲ ޖާބިރުގެ ވީޑިއޯއެއްގައި ޖާބިރުވަނީ ގޭގައި ތިބެ ޓިކެޓް ނެގެން ޖެހޭނެ ކަމަށް ވިދާޅުވެފައެވެ.
ރާއްޖެއާ އިންޑިޔާ މެޗުގެ ޓިކެޓް ޑިމާންޑް ބޮޑުވެ، މެންދުރެއްހާއިރުވެސް ދަންވަރުން ފެށިގެން ހަދާފައި އޮތް ކިއު ކުޑަ ނުވެއެވެ. ޓިކެޓް ވިއްކަމުން އައީ އެންމެ ތަނަކުންނެވެ. އެއީ ޒުވާނުންގެ މަރުކަޒެވެ. ދިހައެއް ޖެހިއިރު ޒުވާނުންގެ މަރުކަޒުގައި ޓިކެޓް ވިއްކަން ފެށިއިރު ކިއު އޮތީ ދަރުމަވަންތަ ހޮސްޕިޓަލާ ހިސާބުގައެވެ. މައުލޫމާތު ލިބިފައިވާ ގޮތުގައި އެންމެ ފުރަތަމަ ޓިކެޓް ގަތް މީހާވަނީ އަށާރަ ގަޑިއިރު ކިއުގައި ހޭދަކޮށްފައެވެ.