ދިރާގު ދިވެހި ޕްރިމިއަރ މާޒިޔާއިން ކާމިޔާބުކޮށްފިއެވެ. މާޒިޔާއިން ލީގު ކާމިޔާބު ކުރީ މިރޭ ގްރީން ސްޓްރީޓް ބޮޑު ތަފާތަކުން ބަލިކޮށްގެންނެވެ. މިރޭގެ މެޗު މާޒިޔާއިން ކާމިޔާބު ކުރީ 5-1 ލަނޑުންނެވެ. މި ނަތީޖާއާ އެކު އަންނަ އަހަރުގެ އޭއެފްސީ ކަޕުގެ ގްރޫޕް ސްޓޭޖުން މާޒިޔާއަށްވަނީ ޖާގަ ލިބިފައެވެ.

ބާކީ އަދި ތިން މެޗު ކުޅެން އޮތް މާޒިޔާއިން މިރޭގެ މޮޅާއި އެކުވަނީ 47 ޕޮއިންޓް ހަމަކޮށްފައެވެ. ދެވަނައިގައި އޮތް އީގަލްސްއަށް މިހާތަނަށް ލިބިފައިވަނީ 33 ޕޮއިންޓެވެ. އީގަލްސްއަށް ބާކީއޮތް ހަތަރު މެޗު ކާމިޔާބު ކުރިއަސް ލިބޭނީ 45 ޕޮއިންޓެވެ.

މާޒިޔާގެ ފޯކަސް މިހާރު އޮތީ އަންނަ މަހު ފެށޭ އޭއެފްސީ ކަޕްގެ ކޮލިފައިންގއަށެވެ. އޭއެފްސީ ކަޕް ކޮލިފައިންގައި އަންނަ މަހު މާޒިޔާ ފުރަތަމަ ނުކުންނާނީ ރަށުން ބޭރުގައި ބަންގްލަދޭޝްގެ އަބަހާނީ ލިމިޓެޑާ ދެކޮޅަށެވެ. އޭއެފްސީ ކަޕަށް ތައްޔާރުވުމުގެ ގޮތުން މާޒިޔާއިންވަނީ އެ ޓީމަށް ރާއްޖޭންނާއި ރާއްޖޭން ބޭރުން އިތުރު ކުޅުންތެރިން ހޯދާ ޓީމު ވަރުގަދަކޮށްފައެވެ.