ގެމަނަފުށީގެ ކައުންސިލުގެ ރައީސް އިބްރާހިމް ނާޝިދު "ސީއެންއެމް"އަށް ވިދާޅުވީ އެ ރަށަށް އެމްބިއުލާންސް ލިބިފައިވަނީ މިދިޔަ ހުކުރު ދުވަހުގެ ރޭގެ ވަގުތެއްގައި ކަމަށެވެ.
ނާޝިދު ވިދާޅުވީ ރަށުގައި އާ އެމްބިއުލާންސް ލިބުމާއި ހަމައަށް ބޭނުންކުރަމުންދިޔައީ މީގެ ކުރިން އެރަށުގައި އޮތް ބާވެ ހަލާކުވެފައިވާ އެމްބިއުލާންސެއް ކަމަށާއި، އެ އެމްބިއުލާންސް ހަމައެކަނި އިންޖީނު ނުހުއްޓި ދުއްވޭކަން އެކަނި ކަމަށެވެ.
ދޮރުފަތެއްވެސް ނުހުންނަ 15 އަހަރުވެފައިވާ އެ އެމްބިއުލާންސްގެ ފުރޮޅު އެންމެފަހުން ފަޅައިގެން ދިއުމާއިއެކު ދެން އެރަށުގައި ބަލިމީހުން އުފުލަން ފެށީ ރަށު ޕިކަޕެއްގައެވެ. ނާޝިދު ބުނީ އެ މަރާމާތު ކުރެވޭނެ ގޮތެއް ނެތިގެން ރަށު ޕިކަޕެއް ބޭނުންކުރަމުންދިޔައީ ކަމަށެވެ. 15 އަހަރު ވެފައިވާ ބާ އެމްބިއުލާންސްއަކުން ރަށު ޕިކަޕަކަށް ބަލިމީހުން އުފުލުން ބަދަލުވި ނަމަވެސް މިއަދަކީ ގެމަނަފުށީ ރައްޔިތުންނަށް އުފާވެރި ދުވަހެކެެވެ.
ނާޝިދު ވިދާޅުވީ، އޭނާ ކައުންސިލާއި ހަވާލުވީއިރުވެސް އެ މައްސަލަ އޮތީ އެހެންކަމަށާއި ނަމަވެސް މީގެ ކުރީ ކައުންސިލުތަކުންވެސް އަބަދުވެސް އާ އެމްބިއުލާންސަކަށް ސަރުކާރުގައި އެދެމުންދިޔަ ކަމަށެވެ. އަދި ޒަމާންތަކަކަށްފަހު މިއަދު ރައްޔިތުން އެދިއެދި ތިބި ކަމެއް މި ސަރުކާރު އާފަހުން ހައްލުވެގެން ދިއުމުން ނާޝިދު ވަނީ އެކަމަށްޓަކައި ސަރުކާރަށް ވަރަށް ބޮޑަށް ޝުކުރު އަދާކުރައްވާފައެވެ.
ރާއްޖޭގެ ބައެއް ރަށްރަށުގައި އެމްބިއުލާންސް ނެތުމުގެ ސަބަބުން ބަލި މީހުން އުފުލުމުގައި ތަކުލީފުތަކެއް އުފުލަން ޖެހިފައި ވެއެވެ. އެގޮތުން ބައެއް ފަހަރު ގާޑިޔަލުގައި ނޫނީ ބަރޯގައި ނުވަތަ ޕިކަޕެއްގައި ބަލިމީހުން އުފުލަން ޖެހިފައި އެބަހުއްޓެވެ.
މިކަންތައް ސޯޝަލް މީޑިއާގައި ބައެއް ފަރާތްތަކުން ހާމަކުރުމުން ސަރުކާރަށް އަމާޒުވި ފާޑުކިޔުންތަކާއިއެކު ރަށްރަށަށް އެމްބިއުލާންސް ފޮނުވުމުގެ މަސައްކަތް އަވަހަށް ހައްލުކުރަން މަސައްކަތް ކުރަމުންދާކަމަށް ހެލްތު މިނިސްޓްރީން ދިއައީ ބުނަމުންނެވެ.
އަތޮޅުތެރެއަށް ބޭނުންވާ 96 އެމްބިއުލާންސް ގެނައުމަށްޓަކައި މިނިސްޓްރީ އޮފް ފިނޭންސްއާއި ސްޓޭޓް ޓްރޭޑިން އޯގަނައިޒޭޝަން ޕލކ (އެސްޓީއޯ) އާއެކު ހެލްތު މިނިސްޓްރީން ވަނީ މިދިޔަ ޖޫން މަހުގެ 10ވަނަ ދުވަހު ސޮއިކޮށްފައެވެ. އެ އެއްބަސްވުމުގައި ސޮއިކޮށްފައި ވަނީ މާލޭގައި އެމްބިއުލާންސްގެ ހިދުމަތް ދިނުން ލަސްވުމުގެ ސަބަބުން އުމުރުން 10 އަހަރުގެ ކުޑަކުއްޖަކު ނިޔާވި ހާދިސާއެއް ހިގުމުންނެވެ.
އެދުވަހުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ނަސީމް ވިދާޅުވީ، އެމްބިއުލާންސްގެ ހިދުމަތް އިތުރަށް ފުޅާވެގެން ދިޔުމުން އަތޮޅުތެރޭގައި މިހާރު ކުރިމަތިވަމުންދާ ގިނަ ގޮންޖެހުންތަކަށް ހައްލު ލިބިގެންދާނެ ކަމަށެވެ.
ނަމަވެސް އޭގަފަހުންވެސް އެމްބިއުލާންސްތައް ގެނައުން ވަރަށް ބޮޑަށް ލަސްވެގެންދާތީ ފާޑުކިޔުންތައް އަމާޒުވަމުންދިޔައެވެ. ގެންނަން ވައުދުވި 96 އެމްބިއުލާންސްގެ ތެރެއިން 20 އެމްބިއުލާންސް ރާއްޖެ ގެނެސްފައިވަނީ މިދިޔަ އޮކްޓޫބަރު މަހުގެ ހަތްވަނަ ދުވަހު އެވެ. އެ އެމްބިއުލާންސްތައް ރަށްރަށަށް ފޮނުވަމުންދާކަން ހާމަކުރީ އެމަހުގެ 30 ވަނަ ދުވަހުއެވެ.
ސަރުކާރުން ބުނީ މިފަހަރު އެމްބިއުލާންސްތައް ފޮނުވާފައިވަނީ އެންމެ ބޮޑަށް އެމްބިއުލާންސް ނެތުމުގެ ދަތިކަން ކުރިމަތިވާ ރަށްތަކުގެ ތެރެއިން 20 ރަށަށްކަމަށެވެ.
އެމްބިއުލަންސް ފޮނުވާ ރަށްތައް:
- އއ.ތޮއްޑޫ
- ފ.ބިލެއްދޫ
- ތ. ގާދިއްފުށި
- ތ.މަޑިފުށި
- ގއ. ގެމަނަފުށި
- ކ.މާމެންދޫ
- އދ.ދަނގެތި
- ކ.ހުރާ
- ބ.ކުޑަރިކިލު
- ބ.ތުޅާދޫ
- ޅ.ކުރެންދޫ
- ރ.އިނގުރައިދޫ
- ނ.މިލަދޫ
- ނ.ހެނބަދޫ
- ށ.މަރޮށި
- ށ.ފޯކައިދޫ
- ހދ.ނޮޅިވަރަން
- ހދ.މަކުނުދޫ
- ހއ.އުލިގަމު
- ހއ.ފިއްލަދޫ
