މޯލްޑިވްސް ނެޝަނަލް ޕާޓީ(އެމްއެންޕީ)އާއި ގުޅިވަޑައިގެން ސަބާބާއިމެދު "އަވަސް" ނޫހުގެ ސުވާލަކަށްފަހު ސުވާލެއް ޕްރޮގްރާމުގައި ވާހަކަދައްކަވަމުން ދުންޔާ ވިދާޅުވީ، ރާއްޖޭގައި ސިޔާސީ ޕާޓީ އުފެއްދުނީ ވަރަށް އުންމީދުގައި ކަމަށާއި، ނަމަވެސް މިހާރު ރާއްޖޭގެ ސިޔާސީ މަޝްރަހުގައި އެންމެ ބޮޑު ދެ ޕާޓީގެ ގޮތުގައި އޮތް އެމްޑީޕީއާއި ޕީޕީއެމްއަށްވެސް ރައްޔިތުން ސަރުކާރެއް ހިންގަން ފުރުސަތު ދީފިކަމަށެވެ. ނަމަވެސް ރައްޔިތުން އެދޭ ކަންކަމާއި ގާތަށްވެސް މަސައްކަތެއް ނުކޮށްދެވޭ ކަމަށެވެ.
އެހެންކަމުން މިހާރު ރައްޔިތުން ބަލާ ގަންނަ އިހްލާސްތެރި އާ ބަޔަކު ބޭނުންވާކަަމަށް ދުންޔާ ވިދާޅުވިއެވެ. ދުންޔާ ވިދާޅުވީ، އެކަމަނާ ސިޔާސީ ޕާޓީއަކާއި ނުގުޅި މަޑުކޮށްގެން ހުރީވެސް އެފަދަ ފުރުސަތަކަށް ކަމަށާއި، އެހެން ހުއްޓާ ކުރީގެ ޑިފެންސް މިނިސްޓަރު ކާނަލް ނާޒިމް އިސްނަވައިގެން އަލަށް ޕާޓީއެއް އުފެއްދަވަން މަސައްކަތްކުރައްވަން ފެއްޓެވުމުން އެއީ ރަނގަޅު ފުރުސަތެއްގެ ގޮތުގައި ދެކެވަޑައިގެން އެ ޕާޓީއާއި ގުޅިވަޑައިގަތީ ކަމަށް ދުންޔާ ވިދާޅުވިއެވެ.
ދުންޔާ އަކީ ކުރީގެ ރައީސް ޔާމީންގެ ވެރިކަމުގައި ފޮރިން މިނިސްޓަރު ކަމުގެ މަގާމު ފުރުއްވި ބޭފުޅެކެވެ. ނަމަވެސް އެ ދަނޑިވަޅުގައި އުފެދުނު ސިޔާސީ ހަމަނުޖެހުންތަކާއިއެކު ކުރީގެ ރައީސް މައުމޫން އަދި ދުންޔާގެ ބައްޕާފުޅު ޖަލަށް ލުމާއި ގުޅިގެން މަގާމުން އިސްތިއުފާ ދެއްވުމަށްފަހު ސިޔާސީ ދާއިރާއާއި ފޭގައި އެކަމަނާ ހުންނެވިއެވެ. ދުންޔާ މިހާރު ހުންނެވީ، އަލަށް އުފެދުނު އެމްއެންޕީގެ އަންހެނުންގެ ގޮފީގެ ރައީސްގެ މަގާމުގައެވެ.
